بیورو رپورٹ بی بی سی اردو ڈاٹ کام، اسلام آباد

	دہشت گردی، انتہا پسندی کے سدباب پر بھی بات چیت ہو گی۔

دفتر خارجہ کے ترجمان محمد صادق نے بدھ کو پریس بریفنگ کے دوران بتایا کہ یہ دورہ پاکستان کے ساتھ اظہار یکجہتی کیلئے ہے۔

صدر پرویز مشرف کے دوبارہ انتخاب کے بعد صدر حامد کرزئی پاکستان کا دورہ کرنے والے دوسرے غیر ملکی سربراہ مملکت ہیں۔

دفتر خارجہ کے ترجمان نے کہا کہ صدر پرویز مشرف نے اس سال اگست میں پاک افغان امن جرگے میں شرکت کے موقع پر افغان صدر کو دورہ پاکستان کی دعوت دی تھی۔ دونوں برادر ممالک کی قیادت کے درمیان تسلسل سے دوروں کے تبادلے، پاک افغان تعلقات کا طرہ امتیاز ہیں۔

ترجمان نے بتایا کہ افغان صدر اپنے قیام کے دوران صدر پرویز مشرف اور وزیراعظم محمد میاں سومرو سے ملاقاتیں کریں گے جن میں دو طرفہ تعلقات، افغانستان کی تعمیر نو، علاقائی اور عالمی صورتحال زیر غور آئے گی۔

صدر اور وزیراعظم افغان صدر کے اعزاز میں ضیافت اور ظہرانہ دیں گے۔

انہوں نے کہا کہ افغان صدر کے دورے سے دونوں برادر ممالک کے درمیان کثیر الجہتی تعلقات مزید مستحکم ہونگے۔ ایک سوال پر ترجمان نے کہا کہ صدر کرزئی پاکستانی قیادت کے ساتھ دہشت گردی اور انتہا پسندی کے سدباب کے معاملات پر بھی بات چیت کریں گے۔

ترجمان نے مزید کہا کہ بھارت میں ہونے والے انتہا پسندی یا دہشت گردی کے کسی بھی معاملے میں پاکستان ملوث نہیں، نہ ہی اپنی سرزمین بھارت سمیت کسی بھی ملک کے خلاف استعمال کرنے کی اجازت دے گا۔

’انتہا پسندوں کے سدباب کیلئے کسی بھی ملک کی فورسز کو پاکستان میں داخل ہونے کی اجازت نہیں دی گئی اور پاکستانی فوج عسکریت پسندوں سے نمٹنے کی پوری صلاحیت رکھتی ہے۔‘