ہارون رشید بی بی سی اردو ڈاٹ کام، اسلام آباد

	ایم ایم اے کو غیر سیاسی فورم کے طور پر برقرار رکھنے پر اتفاق۔

تاہم اتحاد کو غیر سیاسی فورم کے طور پر برقرار رکھنے پر فریقین میں اتفاق دیکھا جا رہا ہے۔

متحدہ مجلس عمل اور جماعت اسلامی کے سربراہ قاضی حسین احمد نے آج صبح اچانک اتحاد کی سپریم کونسل کے اسلام آباد میں اجلاس کی منسوخی کا اعلان کر دیا۔

تاہم بعد میں جمیعت علمائے اسلام کے سربراہ اور مجلس کے سیکٹری جنرل مولانا فضل الرحمان نے یہ اجلاس دوبارہ وقت مقررہ پر طلب کرکے تمام جماعتوں کو شرکت کی دعوت دے دی۔ ان کا کہنا تھا کہ سب پارٹی سربراہان موجود تھے لہٰذا منسوخی مناسب نہیں تھی۔

لاہور بار میں آج صبح خطاب کے بعد قاضی حسین احمد نے صحافیوں کے ایم ایم اے کے مستقبل سے متعلق سوالات کا جواب دینے سے انکار کیا۔

اس سے بظاہر محسوس ہوتا ہے کہ جماعت اسلامی اور جمیعت علمائے اسلام کے درمیان کم از کم عام انتخابات کے معاملے پر اب مزید کسی بات چیت کی گنجائش نہیں رہی۔

مولانا فضل الرحمان نے گزشتہ ہفتے ایم ایم اے کے ایک اجلاس میں جماعت کو قائل کرنے کی آخری کوشش کا اعلان کیا تھا تاہم اس کا کوئی نتیجہ برآمد نہیں ہوا تھا۔

دونوں جماعتیں ایم ایم اے کو توڑنے پر ابھی تیار دکھائی نہیں دے رہی ہیں۔ اس بارے میں قاضی حسین احمد کا موقف تھا کہ سیاسی اور انتخابی اتحاد نہ سہی لیکن دینی اتحاد کی ضرورت پھر بھی موجود ہے۔ ’اس اتحاد نے مسلکی اختلافات کو کم کرنے میں مدد دی ہے۔ اس کی ضرورت پہلے بھی تھی اور اب بھی ہے۔‘

’ہمارا منشور ایک ہے۔ ہم سب اس پر متفق ہیں کہ اختلاف صرف انتخاب میں حصہ لینے یا نہ لینے پر ہے۔ اگر یہ ٹوٹتا ہے تو یہ بہت بڑی زیادتی ہوگی اپنے مقاصد، اہداف کے ساتھ۔‘ مولانا فضل الرحمان

دوسری جانب مولانا فضل الرحمان کا کہنا ہے کہ حزب اختلاف کے اتحادوں میں تقسیم اور ٹوٹ پھوٹ قابل تشویش ہے لیکن وہ اختلافات کے باوجود اس دینی اتحاد کو برقرار رکھنے کی بھرپور کوشش کریں گے۔

’ہمارا منشور ایک ہے۔ ہم سب اس پر متفق ہیں کہ اختلاف صرف انتخاب میں حصہ لینے یا نہ لینے پر ہے۔ اگر یہ ٹوٹتا ہے تو یہ بہت بڑی زیادتی ہوگی اپنے مقاصد، اہداف کے ساتھ۔‘

دو بڑی جماعتوں کے درمیان انتخابات پر واضع دو ٹوک موقف اختیار کرنے کے بعد ایم ایم اے اب سیاسی یا انتخابی اتحاد نہیں رہا جس سے انتخابات میں جے یو آئی کو فائدہ ہونے کے ساتھ ساتھ نقصان کا بھی احتمال ہے۔