اعجاز مہر بی بی سی اردو ڈاٹ کام، اسلام آباد

	بینظیر بھٹو عجلت میں پرانا پاسپورٹ لے کر ائرپورٹ پہنچی تھیں

اس سے پہلے جمعرات کو سابق وزیراعظم بینظیر بھٹو جب اسلام آباد سے دبئی جانے کے لیے ہوائی اڈے پہنچیں تو انہیں امیگریشن حکام نے ملک سے باہر جانے کی اجازت نہیں دی تھی۔

اس بارے میں پیپلز پارٹی کے ترجمان فرحت اللہ بابر نے بتایا تھا کہ اصل میں بینظیر بھٹو عجلت میں اپنا پرانا اور خارج المدت پاسپورٹ اٹھا کر آئیں تھیں۔ ان کے موقف کی اسلام آباد کے ہوائی اڈے پر تعینات حکام نے بھی تصدیق کی تھی۔

انہوں نے مزید بتایا کہ محترمہ بینظیر بھٹو بچوں سے ملنے جا رہی ہیں اور چند روز دبئی میں قیام کے بعد واپس پاکستان آئیں گی۔

بینظیر بھٹو ایسے وقت میں دبئی جا رہی ہیں جب حزب مخالف کے دو بڑے اتحاد چارٹر آف ڈیمانڈ کو حتمی شکل دینے میں مصروف ہیں۔

ایسے میں ان کی اچانک دبئی روانگی پر سیاسی حلقوں میں حیرانگی ظاہر کی جا رہی ہے۔ بعض سیاسی مبصرین کہتے ہیں کہ انہیں بظاہر ایسا نظر آتا ہے کہ وہ انتخابات کے بائیکاٹ کے سلسلے میں کچھ وقت چاہتی ہیں۔

یاد رہے کہ سابق وزیراعظم بینظیر بھٹو سے بدھ کو اٹھارہ عرب ممالک کے سفیروں نے ملاقات کی تھی۔ جبکہ انہوں نے خود جا کر امریکی سفیر کی رہائش گاہ پر ان سے ملاقات کی تھی۔