بیورو رپورٹ بی بی سی اردو ڈاٹ کام، اسلام آباد

	پی آئی اے کی پروازوں پر مارچ 2007 میں پابندی لگی تھی

پاکستان انٹرنیشنل ائرلائنز کی جانب سے جاری کردہ بیان کے مطابق یورپی یونین کی جانب سے قومی ائر لائن کے چند طیاروں پر یورپ کے لیے پروازوں پر عائد پابندی کو اب ختم کر دیاگیا ہے۔

بیان کے مطابق اس بات کا فیصلہ بیس ستمبر دو ہزار سات کو یورپی یونین کے ائر سیفٹی اجلاس میں کیا گیا تاہم اس فیصلے کا باضابطہ نوٹیفیکیشن بدھ کو جاری کیا گیا ہے۔

پی آئی اے کے مطابق پابندیاں لگنے کے بعد ائر لائن نے اپنے طیاروں کو یورپی یونین کے معیار کے مطابق بنانے کے لیے ریکوری پلان ترتیب دیا تھا اور یورپی یونین نے ان اقدامات پر اطمینان کا اظہار کیا ہے۔

پی آئی اے انتطامیہ نے یورپی یونین کی جانب سے پابندیاں ختم کرنے پر اطمینان کا اظہار کیا ہے اور بین اقوامی فضائی حفاظت کے معیار کو برقرار رکھنے کے عزم کا اظہار کیا ہے۔

یاد رہے کہ یورپی یونین نے اسی برس مارچ میں پی آئی اے کے بیشتر طیاروں کی پروازیں 27 رکن ممالک کے لیے ممنوع قرار دے دی تھیں اور ان کے حفاظتی انتظامات پر تشویش کا اظہار کیا تھا۔ اس پابندی کا اطلاق ائر لائن کے بیالیس میں سے پینتیس طیاروں پر ہوا تھا اور صرف بوئنگ 777 ساخت کے سات طیارے اس پابندی سے مستثنیٰ تھے۔