رفعت اللہ اورکزئی بی بی سی اردو ڈاٹ کام، پشاور

	سرحد کی نگران کابینہ کے چار

بدھ کو گورنر ہاؤس پشاور میں حلف برداری کی تقریب منعقد ہوئی جس میں نگران وزیراعلی شمس الملک، وفاقی وزراء، مسلم لیگ (ق) کے رہنماؤں اور اعلی سول حکام نے شرکت کی۔ گورنر سرحد علی محمد جان اورکزئی نے نگران وزراء سے ان کے عہدوں کا حلف لیا۔ حلف اٹھانے والوں میں شہزادہ گستاسب خان، بخت بیدار خان، اعظم خان اور محمد علی شاہ باچا شامل ہیں۔

نگران کابینہ میں شامل ہونے والے شہزادہ گستاب خان حال ہی میں توڑی جانے والی سرحد اسمبلی میں قائد حزب اختلاف تھے اور ان کو محکمہ داخلہ کا قلمدان سونپا گیا ہے جبکہ ان کا تعلق ہزارہ ڈویژن سے ہے۔

اعظم خان سرحد کے چیف سیکرٹری رہے چکے ہیں اور ان کو محکمہ خزانہ کا محکمہ دیا گیا ہے۔ محمد علی شاہ باچا مسلم لیگ (ق) کے رہنما ہیں اور پہلے بھی صوبائی وزیر رہ چکے ہیں ، انہیں ورکس اینڈ سروسز کا قلمدان سونپا گیا ہے جبکہ کابینہ میں شامل ہونے والے چوتھے وزیر بخت بیدار خان کا تعلق پیپلز پارٹی شیر پاؤ سے ہے۔ وہ 1993 سرحد اسمبلی کے رکن رہ چکے ہیں اور ان کو محکمہ محنت کی وزرات دی گئی ہے۔

ادھر گورنر سرحد علی محمد جان اورکزئی نے کہا ہے کہ قبائلی علاقوں میں عوام کو اب یہ احساس ہوگیا ہے کہ غیر ملکیوں کو پناہ دینے کی وجہ سے ان کو مشکلات کا سامنا کرنا پڑ رہا ہے۔

حلف برداری کے بعد صحافیوں سے مختصر گفتگو کرتے ہوئے گورنر نے کہا کہ وزیرستان میں دواڑ قبیلے نے اپنا قومی لشکر تیار کرلیا ہے اور اب وہ بیدار ہوگئے ہیں اور یہ اچھی بیداری ہے۔ ان کا کہنا تھا کہ مقامی قبائلی نے غیر ملکیوں کو ڈیڈ لائن دی ہے کہ وہ پرامن طریقے سے چلے جائیں اور اسی طرح قبائل کو بھی کہا گیا ہے کہ وہ غیرملکیوں کو پناہ دینے کا سلسلہ ترک کردیں۔