بیورو رپورٹ بی بی سی اردو ڈاٹ کام، پاکستان

	سنیچر کو احتجاج کے دوران کئی درجن صحافی زخمی ہوئے

اسلام آباد سے ہمارے نامہ نگار آصف فاروقی کے مطابق سنیچر کو اسلام آباد اور پشاور میں صحافیوں پر پولیس تشدد کے خلاف اتوار کو ملک بھر کی طرح اسلام آباد میں بھی صحافیوں نے یوم سیاہ منایا۔ اس موقع پر راولپنڈی اسلام آباد پریس کلب پر سیاہ پرچم لہرایا گیا اور صحافیوں نے بازوؤں پر سیاہ پٹیاں باندھ کر اپنے پیشہ وارانہ امور انجام دیے۔

آزادی کے حق اور آمریت مخالف نعروں کے شور میں جڑواں شہروں اسلام آباد اور راولپنڈی کے صحافیوں کا احتجاجی مظاہرہ میلوڈی میں واقع پریس کلب کے کیمپ آفس سے شروع ہو کر بلیو ایریا سے ہوتا ہوا پارلیمنٹ ہاؤس چوک میں ایک جلسے کی شکل اختیار کر گیا۔

احتجاج میں وکلاء کی جانب سے علی احمد کرد اور منیر اے ملک، سیاستدانوں کی جانب سے پیپلز پارٹی کے پرویز اشرف، مسلم لیگ نواز کے جاوید ہاشمی اور ایم ایم اے کے حافظ حسین احمد شریک ہوئے۔ اس کے علاوہ انسانی حقوق کی تنظیموں اور سول سوسائٹی کے نمائندوں کی بھی ایک بڑی تعداد صحافیوں کے ساتھ اظہار یکجہتی کے لیے پارلیمنٹ ہاؤس کے سامنے موجود تھی۔ جہاں دھرنا دیا گیا، مزید نعرے لگائے گئے اور تقاریر کی گئیں۔

لاہور سے ہمارے نامہ نگار علی سلمان کی رپورٹ کے مطابق لاہور کے صحافیوں نے پنجاب اسمبلی کی سیڑھیوں پر مُردوں کی طرح لیٹ کر احتجاج کیا اور اس دوران ’گو مشرف گو‘ کے نعرے لگائے۔ صحافیوں کا یہ انوکھا مظاہرہ دو منٹ تک جاری رہا جس کے بعد مظاہرین ’صحافت کی آزادی تک جنگ رہے گی جنگ رہے گی‘ کے نعرے لگاتے ہوئے اُٹھ کھڑے ہوئے۔

	مظاہرین نے جنرل پرویز مشرف اور حکومت کے خلاف نعرہ بازی کی

اس موقع پر پولیس کی بھاری نفری بھی تعینات تھی لیکن کوئی ناخوشگوار واقع پیش نہیں آیا۔ صحافیوں نے اعلان کیا ہے کہ وہ پیر کو احتجاجاً وزیراعظم شوکت عزیز کی تقریبات اور سرگرمیوں کی کوریج نہیں کریں گے۔

صحافیوں کے اس جلوس اور احتجاجی مظاہرے میں مجلس عمل، تحریک انصاف اور مسلم لیگ نواز کے کارکنوں نے بھی شرکت کی تھی۔

کوئٹہ سے ہمارے نامہ نگار عزیزاللہ کی رپورٹ کے مطابق اتوار کو بلوچستان کے صحافیوں نے احتجاجی مظاہرہ کیا ہے اور گورنر ہاؤس اور وزیر اعلی ہاؤس کے سامنے دھرنا دیا ہے۔

بلوچستان یونین آف جرنلسٹس کی احتجاجی ریلی کوئٹہ پریس کلب سے روانہ ہوئی تو وکلا اور سیاسی جماعتوں کے قائدین اور کارکنوں نے ان کا ساتھ دیا۔ ریلی مختلف شاہراہوں سے ہوتی ہوئی زرغون روڈ پر گورنر ہاؤس اور وزیر اعلیٰ ہاؤس کے سامنے پہنچی جہاں مظاہرین نے دھرنا دیا ہے۔

احتجاج کے دوران صحافیوں کے نعرے  حکومت کے خلاف احتجاج کے دوران صحافیوں نے ’یہ جو دہشت گردی ہے اس کے پیچھے وردی ہے‘ ’غنڈہ گردی نہیں چلے گی‘ ’حکومت کا جو یار ہے غدارہے غدار ہے‘ صحافیوں اور وکلاء پر حملے نامنظور نا منظور‘

گورنر ہاؤس اور وزیر اعلیٰ ہاؤس کے سامنے بلوچستان یونین آف جرنلسٹس کے صدر، بلوچستان بار ایسوسی ایشن کے صدر، بلوچستان ہائی کورٹ بار ایسوسی ایشن کے صدر، نیشنل پارٹی، پشتونخواہ ملی عوامی پارٹی، اور مسلم لیگ نواز کے رہنماؤں نے خطاب کیا اور حکومتی پالسیوں پر کڑی تنقید کی ہے۔

پشاور میں بی بی سی کے نمائندے رفعت اللہ اورکزئی کے مطابق صحافیوں کی تنظیم خیبر یونین آف جرنلسٹس (کے ایچ یو جے ) کے زیراہتمام اسلام آباد اور پشاور میں اخبارنویسوں پر مبینہ پولیس تشدد کے خلاف ایک احتجاجی مظاہرہ منعقد ہوا جس میں وکلاء ، سیاسی جماعتوں کے رہنماؤں اور سول سوسائٹیز کے نمائندوں نے شرکت کی۔

احتجاجی جلوس پشاور پریس کلب سے شروع ہوا اور گورنر ہاؤس کے قریب جلسے کی شکل اختیار کرگیا۔ پشاور کے علاوہ صوبہ سرحد کے مختلف اضلاع میں بھی صحافیوں کی تنظیموں کی جانب سے اخبارنویسوں پر اسلام اباد میں تشدد کے خلاف احتجاجی مظاہرے اور دھرنے دیے گئے۔

مظفرآباد میں بی بی سی کے نمائندے ذوالفقار علی کے مطابق یوم احتجاج کے موقع پر پاکستان کے زیر انتظام کشمیر کے دارلحکومت مظفرآباد میں بھی صحافیوں نے مظاہرہ کیا۔ مظاہرین پاکستان کے صدر جنرل مشرف اور صحافیوں پر تشدد کے خلاف نعرہ بازی کر رہے تھے۔