شہزاد ملک بی بی سی اردو ڈاٹ کام اسلام آباد

	علی احمد کرد وکلاء تحریک میں فعال کردار ادا کر رہے

الیکشن کمیشن کے سامنے احتجاج کے دوران گرفتاری کے بعد نامعلوم مقام سے اپنے موبائل فون پر بی بی سی اردو سروس سے بات کرتے ہوئے کہا علی احمد کرد نے کہا کہ ان کے علاوہ بھی متعدد وکلاء کو گرفتار کیا گیا ہے۔

علی احمد کرد نے پولیس کے اس دعویٰ کی تردید کی کہ وکلاء نے سپریم کورٹ کی عمارت کے باہر پولیس پر پتھراؤ شروع کیا تھا۔ تاہم انہوں نے کہا کہ وکلاء صدر مشرف کے خلاف نعرے بازی کر رہے تھے اور انہوں نے سپریم کورٹ کے گزشتہ روز کے فیصلے کی کاپیاں بھی نظر آتش کی تھیں۔

انہوں نے کہا کہ وکلاء جب نعرے بازی کرتے ہوئے آگے بڑھے تو پولیس کی بھاری نفری نے انہیں آگے جانے سے روک دیا اور لاٹھی چارج شروع کر دیا اور انہیں اٹھا کر پولیس کی گاڑی میں ڈالا گیا۔

علی احمد کرد نے کہا کہ وکلاء کی یہ تحریک آگے بڑھتی رہے گی اور کسی قیمت پر نہیں رکے گی۔ انہوں نے وکلا کے درمیان اختلافات کو رد کرتے ہوئے کہا کہ یہ افواہیں حکومتی حلقوں اور ایجنسیوں کی طرف سے پھیلائی جا رہی ہیں۔