عبدالحئی کاکڑ بی بی سی اردوڈاٹ کام، پشاور

	چند برس قبل شکار پور میں بھی سرکس کے خلاف ایک بڑا جلوس نکالا گیا تھا

ضلع مانسہرہ کے پولیس سربراہ مظہرالحق کاکا خیل نے بی بی سی کو سرکس کی بندش کی وجہ بتاتے ہوئے کہا کہ یونین کونسل کے ناظم نے اس سلسلے میں پولیس سے کوئی اجازت نہیں لی تھی۔ان کے بقول رمضان کے مہینے کے دوران سرکس لگانے یا ناچ گانے کی محفلوں پر مکمل پابندی ہوتی ہے۔

پولیس کے سربراہ کا مزید کہنا تھا کہ جمعرات کے روز جامع مسجد کے پیش امام مولانا وقارالحق اور یونین کونسل کے ناظم ظاہر شاہ کی قیادت میں درجنوں مشتعل افراد نے سرکس پر حملہ کر دیا تھا اور وہاں پر موجود کرسیوں کو توڑنے کے علاوہ دیگر ساز وسامان کو نقصان پہنچایا تھا۔

	مذہبی رہنما سرکس کو عریانی اور فحاشی سمجھتے ہیں

سرکس کے مالک محمد شفیق نے جیعت علماء اسلام کے مقامی سربراہ اور مرکزی جامع مسجد کے امام مولانا وقارالحق اور یونین کونسل کے ایک ناظم طاہر شاہ کیخلاف مقدمہ درج کروایا تھا۔ پولیس کے سربراہ مظہر الحق کاکا خیل کے مطابق دونوں ملزمان روپوش ہوگئے ہیں۔ان کے بقول پولیس نے ان کی گرفتاری کے لیے کوئی کوشش نہیں کی ہے کیونکہ ان کے کیخلاف درج ہونے والا مقدمہ سنگین نوعیت کا نہیں ہے۔

رمضان میں نہیں  رمضان المبارک کے مہینے کے دوران سرکس لگانے یا ناچ گانے کی محفلوں پر مکمل پابندی ہوتی ہے مانسہرہ پولیس کے سربراہ مظہرالحق کاکا خیل

واضح رہے کہ جمعرات کو مولانا وقارالحق اور یونین کونسل کے ایک ناظم کی سربراہی میں مشتعل افراد نے سرکس پر اس لیے حملہ کیا تھا کیونکہ بقول ان کے سرکس کے ذریعے علاقے میں مبینہ طور پر’ فحاشی و عریانی‘ پھیلائی جا رہی ہے۔ مولانا وقارالحق نے جمعرات کو صحافیوں سے بات چیت کرتے ہوئے کہا تھا کہ فحاشی اور عریانی کی روک تھام کے لیے گزشتہ کئی سالوں سے مانسہرہ میں سرکس لگانے پر علماء اور ضلعی انتظامیہ نے متفقہ طور پر پابندی لگائی ہوئی تھی ۔

تقریباً سات سال کی پابندی کے بعد ضلع مانسہرہ میں گزشتہ ماہ پہلی بار سرکس لگایا گیا تھا جس کو بھی مقامی دینی علماء کے مبینہ دباؤ کی وجہ سے بند کرنا پڑا تھا۔ تاہم جمعرات کو سرکس پر ہونے والا حملہ ضلع مانسہرہ میں اپنی نوعیت کا پہلا واقعہ تھا۔