احمدرضا بی بی سی اردو ڈاٹ کام، کراچی

	مظاہرین نے حکومت، فوج اور ایم کیو ایم کے خلاف نعرے لگائے اور قاتلوں کی گرفتاری کا مطالبہ کیا۔

یہ مظاہرے واقعے میں ہلاک ہونے والے جمعیت کے دو کارکنوں عمران شاہد اور عاطف بٹ کی نماز جنازہ کے موقع پر ہوئے۔اس سے قبل اسی حملے میں ہلاک ہونے والے جمعیت کے ایک اور کارکن غلام صدیق کی نماز جنازہ گزشتہ شب ادا کی گئی جس کے بعد ان کی میت آبائی علاقے گلگت روانہ کردی گئی تھی۔

صوبہ پنجاب کے ضلع چکوال سے تعلق رکھنے والے عمران کی نماز جنازہ مزار قائد کے قریب ایم اے جناح روڈ پر ادا کی گئی جو صوبہ سرحد کے سابق سینئر صوبائی وزیر اور جماعت اسلامی کے صوبائی امیر سراج الحق نے ادا کی، جبکہ کراچی سے تعلق رکھنے ولے عاطف بٹ کی نماز جنازہ ملیر کے علاقے میں ادا کی گئی۔ دونوں مقامات پر پولیس کی بھاری نفری موجود تھی۔ اس موقع پر شرکاء نے حکومت، فوج اور ایم کیو ایم کے خلاف نعرے لگائے اور قاتلوں کی گرفتاری کا مطالبہ کیا۔

ہلاک ہونے والوں میں جمعیت کے تین کارکنوں کے علاوہ اسکردو سے تعلق رکھنے والے جامعہ کراچی کے طالب علم حبیب اللہ، سندھ کے ضلع خیرپور سے تعلق رکھنے والے سرفراز حسین کیریو، محکمہ بہبود آبادی کے ڈرائیور محمد رفیق (کراچی) اور ایک مزدور ایلون (کراچی) شامل ہیں۔ حبیب اللہ امامیہ اسٹوڈنٹس آرگنائزیشن کے کارکن بتائے جاتے ہیں۔

اسلامی جمعیت طلبہ پاکستان کے ناظم اعلی نصراللہ گورایہ نے بی بی سی بات کرتے ہوئے الزام لگایا کہ یہ حملہ اسلامی جمعیت طلبہ کے خلاف حکمران جماعت ایم کیو ایم کی پرتشدد انتقامی کارروائیوں کا تسلسل ہے۔ انہوں نے کہا کہ بدھ کو گلشن اقبال میں واقع جمعیت کے دفتر پر مسلح حملہ کیا گیا اور دو کارکنوں شفیق اور عتیق کو ٹانگوں اور پیٹ میں گولیاں مارکر شدید زخمی کردیا گیا جبکہ دو دیگر کارکنوں سعد لیاقت اور فرحان کو اغواء کرکے ایک فلیٹ میں لے جاکر چارگھنٹوں تک تشدد کا نشانہ بنایا گیا۔

ایم کیو ایم کی تردید  یہ ایک دہشتگردی کی کارروائی ہے جس میں مسافر بس میں لوگوں کو بلاامتیاز دستی بم اور گولیوں کا نشانہ بنایا گیا اور اس کا مقصد شہر کے امن کو نقصان پہنچانا ہے۔ فیصل سبز واری

انہوں نے کہا کہ پورے کراچی شہر کے ساتھ خون کی ہولی کھیلی جارہی ہے لیکن حکمران اس پر خاموش ہیں جس سے ان کے عزائم بھی آشکار ہوگئے ہیں۔

انہوں نے حکومت کو ایک ہفتے کا الٹی میٹم دیتے ہوئے کہا کہ اگر ایک ہفتے کے اندر اس حملے میں ملوث افراد کو گرفتار نہ کیا گیا تو جمعیت کے کارکنان اسلام آباد میں سپریم کورٹ کے باہر احتجاج کریں گے اور اس کے بعد ایوان صدر کا گھیراؤ کیا جائے گا ۔

دوسری جانب متحدہ قومی موومینٹ نے جمعیت کے اس الزام کی سختی سے تردید کی ہے اور اسے بے بنیاد قرار دیا ہے۔ ایم کیو ایم کے رکن سندھ اسمبلی فیصل سبزواری نے بی بی سی سے بات کرتے ہوئے کہا کہ یہ ایک دہشتگردی کی کارروائی ہے جس میں مسافر بس میں سوار لوگوں کو بلاامتیاز دستی بم اور گولیوں کا نشانہ بنایا گیا اور اس کا مقصد شہر کے امن کو نقصان پہنچانا ہے۔

انہوں نے کہا کہ اس واقعے میں ایم کیو ایم کے کارکن محمد رفیق ہلاک ہوئے ہیں اورگلشن اقبال یونٹ کے ذمہ دار حماد کے بھائی اسامہ بھی شدید زخمی ہوئے۔ انہوں نے کہا کہ گزشتہ چند ہفتوں میں شہر میں جمعیت کے کارکنوں کے پنجابی اسٹوڈنٹس آرگنائزیشن (پی ایس اے) اور پنجابی پختون اتحاد (پی پی آئی) کے کارکنوں سے مسلح تصادم ہوئے ہیں جن میں جمعیت کے دو اور پی ایس اے کا ایک کارکن ہلاک ہوا۔ ’ان واقعات میں جس طرح سے جدید اسلحے کا استعمال ہوا ہے وہ میڈیا میں رپورٹ ہوا ہے پھر ان واقعات کے کچھ دنوں کے بعد پی پی آئی کے لوگوں پر فلک ناز پلازہ کے قریب دستی بم پھینکا گیا اور اس سے مختلف لوگ زخمی ہوئے۔ تو یہ سب چیزیں تو کسی اور ہی جانب اشارہ کرتی ہیں‘۔

جمعیت کا الٹی میٹم  اگر ایک ہفتے کے اندر اس حملے میں ملوث افراد کو گرفتار نہ کیا گیا تو جمعیت کے کارکنان اسلام آباد میں سپریم کورٹ کے باہر احتجاج کریں گے اور اس کے بعد ایوان صدر کا گھیراؤ کیا جائے گا۔ نصراللہ گورایہ

ادھر پولیس نے واقعے کا مقدمہ نامعلوم افراد کے خلاف درج کرلیا ہے اور حملے کا نشانہ بننے والی بس کے ڈرائیور علی جان اور کلینر کو تفتیش کے لئے حراست میں لے لیا ہے۔

پولیس حکام کے مطابق ڈی آئی جی آپریشن ایسٹ میر زبیر کی سربراہی میں تفتیشی ٹیم تشکیل دے دی گئی ہے۔ واقعے کے بعد جامعہ کراچی بند ہے اور جمعہ اور سنیچر کے دن ہونے والے امتحانات کے پرچے ملتوی کردیے گئے ہیں۔