شکیل اختر بی بی سی اردو ڈاٹ کام، دلی

	جلاوطنی کے باوجود نواز شریف نے اپنا کردار ادا کر دیا ہے: عزیز برنی

ملک کے سرکردہ اردو روزنامہ راشٹریہ سہارا کے ایڈیٹر عزیز برنی کا خیال ہے کہ جلاوطنی کے باوجود نواز شریف نے اپنا کردار ادا کر دیا ہے۔’ میں سمجھتا ہوں کہ نواز شریف کی وطن واپسی ہوگئی۔ عوام جمہوریت کے لیے بے چین ہیں اور انہوں نے صدر مشرف کو یہ بتا دیا ہے کہ وہ جمہوریت کی بحالی چاہتے ہیں‘۔

سرکردہ تجزیہ کار سعید نقوی کا خیال ہے کہ نواز شریف کی واپسی کے فیصلے سے بے نظير اور جنرل پرویز مشرف کی مبینہ ڈیل کو دھچکا لگا ہے۔’ نواز شریف نے اسلام آباد جا کر بے نظیر بھٹو اور صدر مشرف کی پارٹی میں خلل ڈال دیا ہے۔ اب کوئی ڈیل کر کے بے نظیر کے لیے اسلام آباد آنا مشکل ہوگا‘۔

نواز شریف نے اسلام آباد جا کر بے نظیر بھٹو اور صدر مشرف کی پارٹی میں خلل ڈال دیا ہے۔ اب کوئی ڈیل کر کے بے نظیر کے لیے اسلام آباد آنا مشکل ہوگا سعید نقوی، تجزیہ کار

تاہم وہ کہتے ہیں کہ پاکستان میں جمہوریت کی بحالی کا عمل شروع ہوچکا ہے۔’چیف جسٹس کی معطلی کے بعد ان کی حمایت میں جس طرح ہزاروں وکلاء اور بعد میں لاکھوں کی تعداد میں عوام سڑکوں پر نکل آئے تھے اس سے یہ بات واضح ہے کہ کوئی بھی حکومت آئندہ عدلیہ اور قانون کی بالادستی کو نظر انداز کرنے کی جرات نہیں کرسکتی‘۔

ستیش چندرا کا خیال ہے کہ جنرل مشرف کے اقتدار کے اب زیادہ دن نہیں بچے ہیں۔

ہندوستان میں صدر مشرف کی صدارت کے برقرار رہنے اور جمہوریت کی بحالی کے بارے میں سرکاری طور پر ملے جلے تاثرات ہیں لیکن جمہوریت کے حامیوں کا خیال ہے کہ نواز شریف کی دوبارہ جلا وطنی جنرل کے سیاسی اور ذاتی تکبر کا اظہار ہے۔ لیکن ان کی طاقت اب بتدریج کمزور پڑ رہی ہے۔ ایک ٹی وی چینل کے پروگرام میں ایک ناظر نے کہا ہے ’ نواز شریف کو جلا وطن کر کے جنرل مشرف نے اپنے سیاسی تابوت میں آخری نہیں تو کم از کم ایک اور کیل ضرور ٹھونک لی ہے‘۔