دلاور خان وزیر بی بی سی اردو ڈاٹ کام، ڈیرہ اسماعیل خان

	گزشتہ دو ماہ کے دوران فوجی چوکیوں پر حملوں میں بھی اضافہ ہوا ہے

ادھر جنوبی وزیرستان میں ایک فوجی ہیلی کاپٹر پر فائرنگ ہوئی ہے اور تیارز سکاؤٹس قلعہ میں ایک راکٹ گرنے کے نتیجہ میں سکیورٹی فورسز کا ایک اہلکار ہلاک اور آٹھ زخمی ہوگئےہیں۔

بنوں پولیس کے افسر طاہر نے بی بی سی اردو کو بتایا کہ بدھ کو علی الصبح بنوں شہر سے قریباً پندرہ کلومیٹر جنوب کی جانب نامعلوم افراد نے پولیس اور ایف سی کے ایک مشترکہ چوکی حملہ کیا جس کے نتیجہ میں ایف سی کے تین اہلکار ہلاک ہوگئے ہیں۔

پولیس کے مطابق حملہ آوروں نے راکٹ اور خود کار ہتھیار استعمال کیے جس سے چوکی بھی مکمل طور پر تباہ ہوگئی۔ حکام کے مطابق پولیس اور ایف سی نے مشترکہ جوابی کارروائی بھی کی جس کے نتیجہ دو حملہ آور زخمی ہوگئے۔

حکام کے مطابق اس واقعہ کے بعد پولیس نے پورے علاقے ناکہ بندی کر رکھی ہے اور تلاشی کا عمل شروع کیا ہے لیکن ابھی تک کسی قسم کی گرفتاری عمل میں نہیں آئی ہے۔

ادھر پاکستان کے قبائلی علاقے جنوبی وزیرستان میں فوجی ہیلی کاپٹر پر فائرنگ کے بعد سکیورٹی فورسز اور حملہ آوروں کے مابین شدید فائرنگ کا تبادلہ ہوا ہے۔
مقامی انتظامیہ کا کہنا ہے کہ بدھ کو وانا سے پچیس کلومیٹر شمال کی جانب تحصیل تیارزہ میں ایک فوجی ہیلی کاپٹر وانا سے پہاڑی علاقوں میں موجود سکیورٹی فورسز کے لیے راشن لے جا رہا تھا کہ ایک پہاڑی سلسلے سے ہیلی کاپٹر پر فائرنگ کی گئی۔

اس حملے کے بعد فوج نے جوابی کارروائی شروع کی جس میں علاقہ تیارزہ میں مشکوک ٹھکانوں کو نشانہ بنایا گیا۔حکام کے مطابق فوج نے کارروائی میں وانا سکاؤٹس کیمپ اور زیڑی نور سے توپخانے کا بھی استعمال بھی کیا۔حکام کے مطابق شدت پسندوں نے بھی مختلف علاقوں سےفوجی ٹھکانوں پر حملے کیے جس دوران ایک راکٹ سکاؤٹس قلعہ تیارزہ میں گرا جس کے نتیجے میں سکیورٹی فورسز کا ایک اہلکار ہلاک اور آٹھ زخمی ہوگئےہیں۔