عبدالحئی کاکڑ بی بی سی اردوڈاٹ کام، پشاور

	واقعہ جمعرات کی دوپہر ڈیڑھ بجے باجوڑ کے صدر مقام خار میں پیش آیا (فائل فوٹو)

دوسری طرف کرم ایجنسی میں حکام کو ایک سربریدہ لاش ملی ہے جس سے مبینہ طور پر امریکہ کے لیے جاسوسی کرنے کے الزام میں قتل کیا گیا ہے۔

نوابزادہ شمس الوہاب باجوڑ کے سابق نواب اور رکن قومی اسمبلی مرحوم عبدالسبحان خان کے بیٹے اور باجوڑ کے موجودہ رکن قومی اسمبلی شہاب الدین خان کے قریبی رشتہ دار ہیں۔ تازہ ترین اطلاعات کے مطابق رکن قومی اسمبلی شہاب الدین خان نے بتایا ہے کہ نوابزادہ شمس الوہاب ہسپتال میں دم توڑ گئے ہیں۔

اس سے قبل پولٹیکل انتظامیہ کے ایک اہلکار نے بی بی سی کو بتایا کہ یہ واقعہ جمعرات کی دوپہر ڈیڑھ بجے باجوڑ کے صدر مقام خار میں اس وقت پیش آیا جب نوابزادہ شمس الوہاب اپنی گاڑی میں گھر جا رہے تھے کہ ایک زوردار دھماکہ ہوا۔ دھماکے میں وہ اور انکے ڈرائیور شدید زخمی اور گاڑی میں سوار ان کے دو نوکر معمولی زخمی ہوگئے تھے۔ تاہم عینی شاہدین کا کہنا ہے کہ یہ ریموٹ کنٹرول بم کا ایک دھماکہ تھا۔

زخمیوں کو باجوڑ کے ڈسٹرکٹ ہسپتال منتقل کردیا گیا تھا جہاں دو افراد کو ابتدائی طبی امداد فراہم کرنے کے بعد فارغ کر دیا گیا تھا

	قبائلی علاقوں میں امریکہ کے لیے جاسوسی کے الزام میں مقامی اور افغان باشندوں کو قتل کرنے کا سلسلہ جاری ہے

کرم ایجنسی سے ملنے والی اطلاعات کے مطابق حکام کو یہ لاش جمعرات کی صبح باچا کوٹ نامی علاقے میں ایک بر ساتی نالے سے ملی ہے جس کے ساتھ پشتو زبان میں ایک خط بھی ملا ہے۔

خط میں دعویٰ کیا گیا ہے کہ مقتول قیام الدین کا تعلق افغانستان سے ہے اوروہ افغان نیشنل آرمی میں بطور افسر خدمات سرانجام دیتے رہے ہیں۔خط میں یہ بھی دعویٰ کیا گیا ہے کہ انہیں علاقے میں امریکہ کے لیے جاسوسی کرنے کے الزام میں قتل کیا گیا ہے۔ حکام نے لاش علی زئی کی قبرستان میں امانتاً دفنا دی ہے۔

اس سلسلے میں حکومت سے رابطے کی بارہا کوششیں کی گئیں مگر کامیابی نہیں ہوئی۔

واضح رہے کہ پچھلے ماہ بھی اپر کرم ایجنسی میں ایک شخص کو مبینہ طور پر امریکہ کے لیے جاسوسی کرنے کے الزام میں قتل کیا گیا تھا۔ قبائلی علاقوں میں ایک طویل عرصے سے امریکہ کے لیے مبینہ طور پر جاسوسی کرنے کے الزام میں مقامی اور افغان باشندوں کو قتل کرنے کا سلسلہ جاری ہے۔