آصف فاروقی بی بی سی اردو ڈاٹ کام، اسلام آباد

	جناح کی نواسی خورشید بیگم کراچی کے علاقے بلوچ پاڑہ میں نامساعد حالات میں زندگی بسر کر رہی ہیں

یہ بات پارلیمانی امور کے وفاقی وزیر ڈاکٹر شیر افگن نے بدھ کے روز سینیٹ کے اجلاس میں حزبِ اختلاف کے ایک توجہ دلاؤ نوٹس کے جواب میں ایوان کو بتائی۔

سینیٹر انور بیگ نے اپنے نوٹس میں ایوان کی توجہ ایک ہفتہ قبل اخبارات میں شائع ہونے والی اس خبر کی جانب دلوائی جس میں کہا گیا تھا کہ قائد کی پہلی شادی سے ان کی نواسی خورشید بیگم کراچی کے علاقے بلوچ پاڑہ میں انتہائی نامساعد حالات میں زندگی بسر کر رہی ہیں۔

سینیٹر انور بیگ نے کہا کہ بانیِ پاکستان کے اہل خانہ کے ان حالات کے بارے میں جان کر ان کا سر شرم سے جھک گیا ہے۔ انہوں نے کہا کہ حکومت کی بے حسی کا یہ عالم ہے کہ وزیرِ اعظم کی شیو کے سامان کو جراثیم سے پاک کرنے کے لیے تیس لاکھ روپے کی لاگت سے خصوصی مشین حال ہی میں درآمد کی گئی ہے اور دوسری جانب قائد کے اہل خانہ کے پاس ہسپتال جانے کا ٹیکسی کا کرایہ تک نہیں ہے اور حکومت ان کے لیے کچھ نہیں کر رہی۔

وفاقی وزیر ڈاکٹر شیر افگن نے کہا کہ اس خبر کی اشاعت کے بعد پوری قوم کا سر شرم سے جھک گیا ہے۔ انہوں نے اعلان کیا کہ وفاقی حکومت نے سندھ کی حکومت کو سختی سے ہدایت کی ہے کہ بانیِ پاکستان کے اہلِ خانہ سے رابطہ کرکے ان کی ضروریات معلوم کی جائیں اور انہیں پورا کرنے کے اقدامات کیے جائیں۔