احمدرضا بی بی سی اردو ڈاٹ کام، کراچی

	درخواست کے مطابق وہ اپنے تحفظات عدالت عظمیٰ کے سامنے پیش ہوکر بیان کرنا چاہتے ہیں

انہوں نے سپریم کورٹ کراچی رجسٹری میں پیر کو ایک درخواست داخل کی ہے جس میں استدعا کی گئی ہے کہ پاکستان پیپلز پارٹی کی خودساختہ جلاوطن چئرپرسن بے نظیر بھٹو کی جانب سے داخل کردہ آئینی درخواست میں انہیں فریق بنایا جائے جس کے تحت انہوں نے آئندہ انتخابات کے لئے الیکشن کمیشن کی تیار کردہ تازہ کمپیوٹرائزڈ انتخابی فہرستوں کو چیلنج کیا ہے۔

بے نظیر بھٹو نے اپنی درخواست میں مؤقف اختیار کیا ہے کہ نئی انتخابی فہرستوں میں تین کروڑ اہل ووٹر غائب ہیں اور الیکشن کمیشن ووٹر لسٹوں میں ایسے شہریوں کا اندراج کرنے کے لیے تیار نہیں ہے جن کے پاس نادرا کا شناختی کارڈ نہیں ہے۔

چیف جسٹس افتخار محمد چوہدری کی سربراہی میں سپریم کورٹ کی تین رکنی بینچ نے 26 جولائی کو بے نظیر بھٹو کی درخواست کی سماعت کے موقع پر حکومت کو ہدایت کی تھی کہ وہ اپنی غلطی تسلیم کرتے ہوئے ان لوگوں کو حق رائے دینے کا انتظام کرے جن کے پاس نادرا کا شناختی نہیں ہے۔ چیف جسٹس نے الیکشن کمیشن سے کہا تھا کہ ”وہ صدر صاحب کو بتائے کہ شہریوں کو ان کے حقوق سے محروم نہیں کیا جا سکتا۔،،

شناختی کارڈ لازمی ہونے کی شرط ختم کی گئی تو ملک میں مقیم بنگلہ دیش، بھارت، برما اور افغانستان سے تعلق رکھنے والے غیرقانونی تارکین وطن کی بڑی تعداد اپنے ووٹوں کا اندراج کرانے میں کامیاب ہوجائے گی جلال محمود شاہ

جلال محمود شاہ نے اپنی درخواست میں مؤقف اختیار کیا ہے کہ ووٹ کے اندراج کے لئے شناختی کارڈ لازمی ہونے کی شرط ختم کی گئی تو ملک میں مقیم بنگلہ دیش، بھارت، برما اور افغانستان سے تعلق رکھنے والے غیرقانونی تارکین وطن کی بڑی تعداد اپنے ووٹوں کا اندراج کرانے میں کامیاب ہوجائے گی اور اس طرح اس اقدام سے بوگس ووٹنگ کی حوصلہ افزائی ہوگی۔

ان کا کہنا ہے کہ الیکشن کمیشن کے اس فیصلے کے خلاف ان کے کچھ تحفظات ہیں جو وہ عدالت عظمیٰ کے سامنے پیش ہوکر بیان کرنا چاہتے ہیں۔

واضح رہے کہ جلال محمود شاہ بزرگ سندھی قوم پرست رہنما جی ایم سید کے پوتے ہیں اور گزشتہ سال انہوں نے ایک نئی قوم پرست پارٹی سندھ یونائیٹڈ پارٹی کی بنیاد رکھی تھی۔ اس سے قبل وہ ایک جماعت سندھ ڈیموکریٹک الائنس میں شامل تھے جو گزشتہ عام انتخابات کے بعد موجودہ حکمران اتحاد میں شامل ہوئی تھی اور بعد میں مسلم لیگ (ق) میں ضم ہوگئی تھی۔