رفعت اللہ اورکزئی بی بی سی اردو ڈاٹ کام، پشاور

	قائم مقام ضلعی رابطہ افسر کا کہنا تھا کہ دونوں واقعات میں پولیس کو نشانہ بنانے کی کوشش کی گئی ہے

لوئر دیر کے قائم مقام ضلعی رابطہ افسر محمد الیاس نے بی بی سی کو بتایا کہ یہ واقعات جمعرات کی دوپہر تیمرگرہ سے چار کلومیٹر مشرق میں پیش آئے۔

ان کے مطابق پولیس کی ایک وین میں کچھ قیدیوں کو دیر بالا سے تیمرگرہ لایا جارہا تھا کہ عشڑے گٹ کے مقام پر سڑک پر پہلے سے نصب ریموٹ کنٹرول بم پھٹنے سے گاڑی میں سوار چار پولیس اہلکار اور تین قیدی زخمی ہوگئے۔ زخمیوں میں اے ایس ائی نصراللہ بھی شامل ہیں۔

ان کا کہنا تھا کہ اس واقعہ کے بیس منٹ بعد اسی مقام کے قریب ایک اور پولیس گاڑی کو ریموٹ کنٹرول بم حملے کا نشانہ بنایا گیا جس سے گاڑی میں سوار دو پولیس اہلکار زخمی ہوئے۔ زخمیوں میں ڈی ایس پی انویسٹی گیشن بھی شامل ہیں جو پہلے واقعہ کی تحقیقات کے لیے جائے وقوعہ کی طرف جارہے تھے۔ زخمیوں کو تیمرگرہ ہپستال منتقل کردیا گیا ہے۔

	پہلے واقعہ کے بیس منٹ بعد ایک اور پولیس گاڑی کو ریموٹ کنٹرول بم حملے کا نشانہ بنایا گیا

ادھر سوات کے علاقے مٹہ میں تعینات فوج کے پانچ سو سے زائد جوانوں اور گاڑیوں کے ایک قافلے کو انتہائی سخت حفاظتی انتظامات میں فرنٹیر ہاؤس کبل منتقل کردیا گیا ہے۔

عینی شاہدین کا کہنا ہے کہ اس موقع پر سکیورٹی کے غیر معمولی انتظامات کیے گئے تھے اور تمام راستوں کو بند کردیا گیا تھا جبکہ قافلے کے حفاظت کےلیے ہیلی کاپٹر بھی استعمال کیے گئے۔ مقامی افراد کا کہنا ہے کہ تقریباً چار گھنٹے تک سوات کے تمام راستے بند رہے جس سے علاقے کا رابطہ ملک کے دیگر شہروں سے منقطع رہا۔ قافلے میں فوجی جوانوں کے علاوہ چار درجن کے قریب فوجی گاڑیاں بھی شامل تھیں۔

واضح رہے کہ لال مسجد آپریشن کے بعد فوج کو سوات کے مختلف علاقوں میں تعینات کیا گیا ہے جس کے بعد ان پر حملوں میں بھی اضافہ ہوا ہے۔

دوسری طرف صوبائی حکومت نے بھی فوجی جوانوں کی مختلف علاقوں میں تعیناتی پر ناراضگی کا اظہار کرکے صدر جنرل پرویز مشرف سے مطالبہ کیا تھا کہ فوج کو ایک جگہ تعینات کیا جائے تاکہ عام لوگوں کو مشکلات پیش نہ ہوں۔