رفعت اللہ اورکزئی بی بی سی اردو ڈاٹ کام، پشاور

	ریموٹ کنٹرول بم پھٹنے سے گاڑی میں سوار تین پولیس اہلکار زخمی ہوئے(فائل فوٹو)

زخمیوں کو بڈخیلہ ہپستال منتقل کردیا گیا ہے اور ان میں تھانہ اوچ کے ایس ایچ او بھی شامل ہیں۔

دیر سے ملنے والی اطلاعات کے مطابق یہ واقعہ منگل کی دوپہر چکدرہ سے چار کلومیٹر دور گل آباد پل کے ساتھ پیش آیا۔ چکدرہ پولیس چوکی کے ایک اہلکار نوروز خان نے بی بی سی کو بتایا کہ پولیس کی ایک موبائل تیمرگرہ چکدرہ سڑک سے گزر رہی تھی کہ سڑک پر نصب ریموٹ کنٹرول بم پھٹنے سے گاڑی میں سوار تین پولیس اہلکار زخمی ہوئے۔ زخمیوں میں اوچ تھانہ کے ایس ایچ او محمد نعیم کے علاوہ دو سپاہی اقبال حسین اور کریم گل شامل ہیں۔

دیرلوئر میں چند دن پہلے بھی پولیس کی دو موبائل گاڑیوں کو ریموٹ کنٹرول بم حملوں میں نشانہ بنایا گیا تھا جس میں گیارہ پولیس اہلکار زخمی ہوگئے تھے۔

ادھر دیر میں مقامی ذرائع کا کہنا ہے کہ علاقے میں تعینات فوجی اہلکاروں نے رات کے وقت سرچ آپریشن شروع کردیا ہے جس سے علاقے میں شدید خوف وہراس پھیل گیا ہے۔ ایک مقامی صحافی نے بتایا کہ سرچ آپریشن ملا کنڈ یونیورسٹی میں تعینات فوجی اہلکاروں پر ہونے والے راکٹ حملے کے بعد شروع کیا گیا ہے۔

واضح رہے کہ سوات اور ملا کنڈ ڈویژن میں امن وامان کی تیزی سے بگڑتی ہوئی صورتحال سے نمٹنے کےلئے مرکزی حکومت صوبائی حکومت کے کہنے پر مختلف علاقوں میں فوج کی بھاری نفری تعینات کی ہے جس سے علاقے میں شدید ناراضگی پائی جاتی ہے۔