ریاض مسرور، بی بی سی ڈاٹ کام، سرینگر

	’نئی دلّی کے ساتھ تب تک بات چیت ممکن نہیں جب تک انسانی حقوق کی پامالیاں ختم نہیں ہو جاتی: میر واعظ

پائین شہر کے ایس پی بشیر احمد خان نے بی بی سی کو بتایا کہ پائین شہر کے نائد کدل علاقے کے رہنے والے منتظر احمد جمعہ کے روز ہونے والے مظاہروں میں شامل تھے۔ انہوں نے کہا کہ شدید پتھراؤ کے بعد جب پولیس نے مظاہرین کو منتشر کرنے کے لئے لاٹھی چارج اور ٹئیر گیس کا استعمال کیا تو اس دوران منتظر کے سر میں ایک شیل لگا اور رات کو ان کی موت ہوگئی ۔

ہفتے کے روز نائد کدل سے ان کی ہلاکت کے خلاف مظاہرے شروع ہوئے اور پورے ڈاؤن ٹاون علاقے میں دوکانیں بند ہوگئیں۔ اس دوران ٹریفک کو پولیس کی مداخلت کے بعد بحال کیا گیا، لیکن شہر کے نچلے علاقوں میں تناؤ پایا جاتا ہے۔

ایس پی خان کے مطابق حالات قابو میں ہیں اور معمول کی زندگی بحال کر دی گئی ہے۔ ہلاک ہونے والے منتظر احمد کے بھائی نے، سہیل جو مظاہروں میں شامل تھا، بی بی سی کو بتایا کہ ’پہلے پولیس نے بہت سارے آنسو گیس کے شیل پھینکے اور بعد میں فائرنگ کی۔ میں نے منتظر کو گرتے دیکھا۔ میں اس سر سے خون بہتے دیکھا۔ پھر ہم نے اسےصورہ میڈیکل انسٹی ٹیوٹ ہسپتال پہنچایا، اور وہاں اس کی موت ہوگئی‘۔

میڈیکل انسٹی ٹیوٹ کے حکام نے منتظر کی موت کے بارے میں کوئی رائے دینے سے انکار کر دیا اور کہا کہ ’یہ پولیس کیس ہے‘۔

جمعہ کے روز ہونے والے یہ مظاہرے سید علی گیلانی اور جہاد کونسل کی کال پر ’انسانی حقوق کی پامالیوں‘ کے خلاف کئے جارہے تھے۔حریت کانفرنس کے ایک دھڑے کے سربراہ میرواعظ عمر نے بھی ہفتہ بھر کے یورپی دورے سے واپسی پر انسانی حقوق کی خلاف ورزیوں میں اضافہ پر تشویش کا اظہار کیا ہے۔ انہوں نے جمعہ کو ایک بیان میں کہا کہ ’نئی دلّی کے ساتھ تب تک بات چیت ممکن نہیں جب تک انسانی حقوق کی پامالیاں ختم نہیں ہو جاتیں۔ حکومت ہند کو اپنی فورسز کو لگام دینی چائیے‘۔