کانفرنس کا افتتاح سابق وزیراعظم میاں نواز شریف کی تقریر سے ہوا

اس کانفرنس میں قومی اسمبلی میں قائدِ حزبِ اختلاف مولانا فضل الرحمان، ایم ایم اے کے سربراہ قاضی حسین احمد اور اے آر ڈی کے سربراہ اور پاکستان پیپلز پارٹی پارلیمنٹیرینز کے رہنما مخدوم امین فہیم سمیت دیگر اہم اپوزیشن رہنما، سینیئر تجزیہ کار اور سول سوسائٹی کے نمائندے بھی شرکت کر رہے ہیں۔

آل پارٹیز کانفرنس کا آغاز مسلم لیگ (ن) کے قائد نواز شریف کی تقریر سے ہوا۔

نواز شریف کے خطاب کے بعد قائد حزب اختلاف مولانا فضل الرحمٰن کی تقریر ہو گی اور اس کے بعد مقررین کو قومی اسمبلی میں ان کی جماعتوں کی عددی طاقت کی بنیاد پر خطاب کی دعوت دی جائے گی۔

مسلم لیگ نواز کے ترجمان کے مطابق سنیچر کو کل جماعتی کانفرنس کے دو سیشن ہوں گے۔ پہلے سیشن میں میڈیا کو کوریج کی اجازت ہو گی جبکہ بعد دوپہر ہونے والا اجلاس بند کمرے میں ہوگا۔

اتوار کے روز پہلا اجلاس بند کمرے میں اجلاس ہوگا جبکہ بعد دوپہر ہونے والے اختتامی اجلاس میں میڈیا کو کوریج کے لیے دعوت دی گئی ہے۔

کانفرنس کے منتظمین کے مطابق مخدوم امین فہیم کی سربراہی میں پاکستان پیپلز پارٹی کا ایک سات رکنی وفد آل پارٹی کانفرنس میں شرکت کر رہا ہے جبکہ عوامی نیشنل پارٹی کا ایک تین رکنی وفد اسفندیار ولی کی قیادت میں لندن آیا ہوا ہے۔

ایم ایم اے میں شامل مذہبی جماعتوں میں سے جماعت اسلامی کے وفد میں قاضی حسین احمد اور لیاقت بلوچ جبکہ جمیعت علمائے اسلام کے وفد میں مولانا فضل الرحمٰن شامل ہیں۔

آل پارٹی کانفرنس کے دیگر اہم شرکاء میں بائیں بازو کے رہنما عابد حسن منٹو، تحریک انصاف کے سربراہ عمران خان، پختونخواہ ملی عوامی پارٹی کے محمود خان اچکزئی، سندھی قوم پرست رہنما ڈاکٹر قادر مگسی، ممتاز بھٹو،اور رسول بخش پلیجو شامل ہیں۔