عبادالحق بی بی سی اردو ڈاٹ کام ، لاہور

	رجسٹر میں ساٹھ ہزار سے زائد و کلا کے دستخطوں کی گنجائش ہے

ملتان کے ایک وکیل سکندر جاوید نے ایک بڑا رجسٹر بنا کر دستخطوں کے لیے صوبہ پنجاب کی سب سے بڑی ضلعی بار ایسوسی ایشن لاہور میں پہنچا دیا ہے جہاں پر لاہور کے وکلاء کی طرف سے ایوان میں رکھےگئے اس رجسٹر پر دستخط کرنے کا سلسلہ جاری ہے ۔

اس سے قبل بھی وکلاء نے احتجاج کی شدت کو برقرار رکھنے کے لیے اپنے موبائل فون سیٹوں پر’ْْْ گو مشرف گو‘ْ کا نعرہ ریکارڈ کر کے اسے رِنگ ٹون بنایا تھا ۔

چیف جسٹس کے حق میں دستخطی مہم کے لیے تیارہ شدہ رجسٹر میں ساٹھ ہزار سے زائد و کلا کے دستخطوں کی گنجائش ہے۔ اس رجسٹر میں وکلاء نہ صرف دستخط کے ساتھ اپنے کوائف بھی درج کریں گے اور دستخط کرنے والے وکیل کی تصویر بھی چسپاں کی جائے گی ۔

لاہور سے پہلے ملتان اور ساہیوال بار ایسوسی ایشنوں کے وکلاء اس پر دستخط کر چکے ہیں اور اب تک دستخط کرنے والوں کی مجموعی تعداد بارہ ہزار تک پہنچ گئی ہے۔

لاہور بار ایسوسی ایشن کے صدر سید محمد شاہ نے بی بی سی کو بتایا کہ
دو دنوں میں لاہور کے چار ہزار کے لگ بھگ وکلاء نے اس رجسٹر پر دستخط کیے ہیں جبکہ سوموار کو یہ رجسٹر ایوانِ عدل سے لاہور ہائی کورٹ بار ایسوسی ایشن کے احاطے میں پہنچا دیا جائے گا۔

وکلاء کی انجمنوں کا کہنا ہے کہ دستخطی مہم مکمل ہونے پر وہ یہ رجسٹر چیف جسٹس آف پاکستان کو پیش کرنے کا ادارہ رکھتے ہیں۔ یاد رہے کہ
چیف جسٹس افتخار محمد چودھری چودہ جولائی کو لاہور میں ضلعی بار ایسوسی ایشن کے ارکان سے خطاب کرنے والے ہیں۔