ذوالفقار علی بی بی سی اردو ڈاٹ کام، اسلام آباد

	پاکستان میں سلمان رشدی کے خلاف احتجاجی مظاہرے بھی کیے گئے

پاکستان کے زیرِانتظام کشمیر کی قانون ساز اسمبلی میں متفقہ طور پر منظور کی جانے والی قرارداد میں کہا گیا ہے کہ ’دنیا میں امن کی خاطر اس وقت مختلف مذاہب کے درمیان رابطے کی اہمیت کو تسلیم کیا جا رہا ہے اور ایسی صورت حال میں مسلمانوں کے جذبات کو مجروح کرنے والے شخص کو سر کے خطاب سے نوازے جانے سے شدت پسندی اور مذہبی منافرت میں اضافہ ہوسکتا ہے اور یہ اقدام مذاہب کے درمیان دوری پیدا کرنے کا سبب بن سکتا ہے‘۔

قرارداد میں کہا گیا ہے کہ’ ناموس رسالت کا تحفظ ہمارا بنیادی عقیدہ ہے اور امت مسلمہ پیغمبرِ اسلام کی توہین برداشت نہیں کرے گی۔ اس وقت ضرورت اس امر کی ہے کہ تمام مذاہب کے ماننے والوں کے جذبات کا احترام کیا جائے‘۔

قرارداد میں برطانیہ کی حکومت سے مطالبہ کیا گیا ہے کہ مسلمانوں کے جذبات کی توہین سے اجتناب کرے اور سلمان رشدی سے سر کا خطاب واپس لے کر مسلمانوں سے معافی مانگی جائے۔

یاد رہے کہ پاکستان کی قومی اسمبلی اور دیگر صوبائی اسمبلیوں نے بھی ملکہ برطانیہ کی طرف سے مصنف سلمان رشدی کو سر کا خطاب دینے کے خلاف قراردادِ مذمت منظور کی تھی۔ اس کے علاوہ پاکستان بھر میں مذہبی جماعتوں نے اس سلسلے میں احتجاجی مظاہرے بھی کیے تھے۔