الطاف حسین بی بی سی اردو ڈاٹ کام، سرینگر

	کشمیر میں کئی لاکھ بھارتی فوج تعینات ہیں

پولیس کا کہنا ہے کہ پہلا واقعہ سوپور علاقہ میں جمعہ کی صبح اس وقت پیش آيا جب بھارتی فوج کے ایک قافلہ پر بعض شدت پسندوں نے گھات لگا کر حملہ کیا۔

پولیس کا کہنا ہے کہ شدت پسندوں نے فوج کے قافلہ پر دستی بم سے حملہ کیا اور گولیاں چلائیں جس کے سبب فوج کی دو گاڑیوں کو نقصان پہنچا۔

پولیس نے یہ بھی کہا ہے کہ مرنے والوں کی تعداد میں مزید اضافہ ہو سکتا ہے کیوں کہ زخمیوں کی حالت کافی نازک ہے۔ حملے کے سبب علاقے میں خوف ہراس پیدا ہو گیا اور لوگ اپنی دکانیں بند کر کے گھروں کی طرف چلے گئے۔

اطلاعات کے مطابق اس حملے میں کوئي شدت پسند زخمی نہیں ہوا ہے۔

ایک دیگر واقعہ میں پولیس نے دارالحکومت سرینگر کے نزدیک ناؤ گام میں دو شدت پسندوں کو ہلاک کر دیا ہے۔

پولیس کے ایک ترجمان نے بتایا کہ جمعہ کی صبح جب پولیس گشت کر رہی تھی، اس وقت ایک باغ میں چھپے ہوئے شدت پسندوں نے ان پر حملہ کیا۔ اس حملے کی جوابی کارروائی میں پولیس نے دو شدت پسندوں کو ہلاک کر دیا۔ پولیس نے بتایا کہ ایک حملہ آور فرار ہو گیا۔

پولیس کے ترجمان کا کہنا ہے کہ ان شدت پسندوں کا تعلق پاکستان سے ہے۔

لیکن ایک شخص نے اپنا نام ظاہر نہ کرنے کی شرط پر بتایا کے پولیس نے ایک فرضی مقابلہ میں دو افراد کو ہلاک کر دیا ہے۔