دلاور خان وزیر بی بی سی اردو ڈاٹ کام، ڈی آئی خان

	یہ امن جرگہ کو ناکام کرنے کے لئے کیا گیا ہے: پولیس سربراہ

حکام کا کہنا ہے کہ بدھ کی رات نو بجے کے بعد ٹانک شہر کے مشرق سے نامعلوم شرپسندوں نے ٹانک ایف سی قلعہ پر تقریباً سات راکٹ داغے ہیں جو سب کے سب زوردار دھماکوں کے ساتھ پھٹے لیکن کسی قسم کا جانی نقصان نہیں ہوا ہے۔ حکام کے مطابق قلعہ کے اندر ایک راکٹ لگنے سے ایک دیوار کو معمولی نقصان پہنچا ہے۔

ٹانک پولیس کے سربراہ ممتاز زرین نے بی بی سی کو بتایا کہ امن جرگے کو ناکام کرنے کے لیے بعض دشمن عناصر نے یہ کام کیا ہوگا۔انہوں نے کہا کہ ٹانک کے واقعات میں ملوث چوبیس افراد کے نام پولیس نے امن جرگے کے حوالے کر دیے ہیں۔ انہوں نے کہا کہ ’اس وقت ہم نام نہیں بتا سکتے کیونکہ نام بتانے سے امن جرگے کی کوششیں متاثر ہوں گی۔‘ پولیس سربراہ کا کہنا تھا کہ ان کی پوری کوشش ہے کہ امن جرگہ ٹانک کے حالت بہتر بنانے میں کامیاب ہوجائے۔

ادھر ضلع بنوں میں تھانہ منڈاخیل پر بھی تین راکٹ داغے گئے ہیں، ایک راکٹ تھانے کی دیوار پر گرا ہے جس سے دیوار کو کافی نقصان پہنچا، لیکن اس واقعہ میں بھی کوئی جانی نقصان کی اطلاع نہیں ملی ہے۔