عبدالحئی کاکڑ بی بی سی اردو ڈاٹ کام، پشاور

	حال میں پاراچینار میں فرقہ وارانہ واردات میں کئی افراد ہلاک ہوئے ہیں (فائل فوٹو)

ڈیرہ اسمعیل خان: تین افراد ہلاک

پولیس کے مطابق جامعہ مسجد سٹیشن ہیڈکوارٹر کے امام حافظ محمد عدنان جمعرات کی دوپہر بارہ بجے سائیکل پر گھر سے مسجد کی طرف جا رہے تھے کہ تین نامعلوم افراد نے فائرنگ کر کےانہیں زخمی کردیا۔

کینٹ تھانہ کے اہلکار گل شیر نے بی بی سی کو بتایا کہ حملہ آور فرار ہونےمیں کامیاب ہوگئے تاہم ان کا کہنا تھا کہ امام مسجد پر یہ حملہ گزشتہ روز اہل تشیع کے تین افراد کی ہلاکتوں کا ردعمل ہوسکتا ہے۔

اہل سنت سے تعلق رکھنے والے حافظ محمد عدنان کو پیٹ میں گولیاں لگی ہیں اور انکی حالت اب خطرے سے باہر ہے۔ ڈیرہ اسمعیل خان میں بدھ کےروز نامعلوم افراد نے ایک گاڑی پر فائرنگ کر کے تین افراد کو ہلاک کر دیا تھا۔

پولیس کا کہنا ہے کہ انہوں نے بدھ کے روز کے واقعہ میں کالعدم تنظیم سپاہ صحابہ کے درجن بھر مشتبہ کارکنوں کو گرفتار کیا ہے لیکن اس سلسلے میں ابھی تک حتمی طور پر کسی کو بھی ذمہ دار نہیں ٹھہرایا جاسکتا۔

ڈیرہ اسماعیل خان میں گزشہ چند ماہ کے دوران فرقہ ورانہ تشدد میں اضافہ ہوا ہے اور کئی ایسے تشدد کے واقعات ہو چکے ہیں۔

مقامی لوگوں کا کہنا ہے کہ حکومت ابھی تک فرقہ ورانہ فسادات پر قابو پانےمیں ناکام رہی ہے اور اس سلسلے میں کوئی گرفتاری نہیں کی گئی ہے۔ پولیس کا کہنا ہے کہ انہوں نے شہر کے بعض ایسے علاقوں میں بھی کارروائیاں کی ہیں جہاں پرعام حالت میں جانا ممکن نہیں ہوتا۔