امداد علی سومرو لاہور

	ریلی میں پنجاب کے مختلف شہروں کے علاوہ سندھ ، سرحد اور بلوچستان سے آئے ہوئے افراد نے بھی بڑی تعداد میں شرکت کی۔

ریلی ایسے موقعہ پر نکالی گئی جب لاہور میں اُنیس ممالک کے کینز گروپ کی تین روزہ کانفرنس جاری ہے اور اس میں زرعی سبسڈی کے حوالہ سے ڈبلیو ٹی او کے لیے سفارشات مرتب کی جا رہی ہیں۔ کینز کانفرنس میں رکن ممالک کے علاوہ ڈبلیو ٹی او کے ڈائریکٹر جنرل پاسکل لامے بھی شریک ہیں۔

مختلف این جی اوز اور کسان تنظیموں پر مشتمل ایکشن گروپ برائے پائیدار زراعت (ساگ) نے کینز کانفرنس کے دوسرے روز منگل وار کو اس کے متوازی کسان مزاحمتی کانفرنس کا انقعاد کیا۔ جس کے بعد کسانوں اور سول سوسائٹی کے نمائندوں نے ڈیوس روڈ سے ایک ریلی نکالی ۔

اتحاد  کسان سندھ کا ہو چاہے پنجاب سرحد یا بلوچستان کا ہم سب کا بھلا اسی میں ہے کہ متحد ہو جائیں نہیں تو حکمران ہمیں نہ حقوق دین گے نہ جینے دیں گے۔ اگر جینا ہے تو متحد ہونا پڑے گا علو بھیل

مظاہرین کی قیادت پاکستان کسان رابطہ کمیٹی کے رہنما فاروق طارق، ساؤتھ ایشیا پارٹنرشپ پاکستان کے رہنما عرفان مفتی، غریب کسان تحریک کی نسرین اعوان، آفتاب عالم اور دیگر رہنا کر رہے تھے۔

ریلی اور کانفرنس سے خطاب کرتے ہوئے رہنماؤں اور عام کسانوں نے ڈبلیو ٹی او کے زراعت سے متعلق معاہدوں کو مسترد کر دیا۔ ان کا کہنا تھا کہ کینز گروپ غریب ممالک کے لیے نہیں بلکہ امیر ممالک کے حقوق کے تحفظ کے لیےکام کر رہا ہے اور لاہور میں ہونے والی کانفرنس بھی اسی سلسلہ کی کڑی ہے۔ انہوں نے سوال اٹھایا کہ لوگوں کو کانفرنس کی تفصیلات سے کیوں آگاہ نہیں کیا جا رہا۔

پاک بھارت مقابلہ  اگر بھارت ایک میزائل کا تجربہ کرتا ہے تو پاکستان دو میزائل چھوڑ دیتا ہے۔ اسلحہ کی دوڑ میں بھارت کا مقابلہ کرنے والے ہمارے حکمران زرعی شعبہ میں بھارت کی جانب سے اپنے کسان کو دی گئی مراعات کا مقابلہ کیوں نہیں کرتے۔ ’کسان کو یہان بجلی پر سبسڈی کیوں نہیں دی جاتی‘، ’کیوں بیج اور کھاد سستی نہیں کی جاتی‘۔ مظاہرین

انہوں نے کینز کانفرنس کو امیر کسانوں کی کانفرنس قرار دیا اور کہا کہ کسانوں کی یہ کانفرنس اصل میں مزاحمتی کانفرنس ہے۔ انہوں نے کہا کہ اگر بھارت ایک میزائل کا تجربہ کرتا ہے تو پاکستان دو میزائل چھوڑ دیتا ہے۔ اسلحہ کی دوڑ میں بھارت کا مقابلہ کرنے والے ہمارے حکمران زرعی شعبہ میں بھارت کی جانب سے اپنے کسان کو دی گئی مراعات کا مقابلہ کیوں نہیں کرتے۔ ’کسان کو یہان بجلی پر سبسڈی کیوں نہیں دی جاتی‘، ’کیوں بیج اور کھاد سستی نہیں کی جاتی‘۔

انہوں نے کہا کہ پاکستان دنیا کے ان ممالک سے عالمی منڈی میں مقابلہ کرنے جا رہا ہے جنہوں نے عالمی معیار کی مارکیٹیں بنائی ہیں۔

کانفرنس میں شریک شیخوپورہ کے ایک عام کسان نے کینز کانفرنس کو کرین کانفرنس قرار دیتے ہوئے کہا کہ پہلے ملٹی نیشنل کمپنیوں نے ہمیں کیمیائی کھاد کی عادت ڈالنے کے لیے کسانوں میں کھاد مفت میں تقسیم کیا جس سے پیداواری لاگت ڈیڑھ ہزار سے بڑھ کر پندرہ ہزار فی ایکڑ تک چلی گئی ہے لیکن پیداوار میں رتی برابر بھی اضافہ نہیں ہوا۔

سندھ کے شہر ٹنڈو محمدخان سے آّئے ہوئے کسان علو بھیل نے کہا کہ کسان سندھ کا ہو چاہے پنجاب سرحد یا بلوچستان کا ہم سب کا بھلا اسی میں ہے کہ متحد ہو جائیں نہیں تو حکمران ہمیں نہ حقوق دین گے نہ جینے دیں گے۔ اگر جینا ہے تو متحد ہونا پڑے گا۔