ہارون رشید بی بی سی اردو ڈاٹ کام، اسلام آباد

	اس پراوز سے مسجد اور مدرسے میں موجود طلبہ میں تشویش پھیل گئی

اسلام آباد کے مصروف مرکزی حصے ایف سکس میں واقع لال مسجد پیر کی صبح ذرائع ابلاغ کی توجہ کا ایک مرتبہ پھر مرکز بنا جب عینی شاہدین کے مطابق ایک فوجی ہیلی کاپٹر نے مسجد اور اس سے متصل مدرسے پر پانچ منٹ تک نیچی پرواز کی۔

فوجی ہیلی کاپٹر: مدرسہ میں تشویش

مفاہمت اسی فیصد، ویب سائٹ بحال

اس پراوز سے مسجد اور مدرسے میں موجود طلبہ میں تشویش پھیل گئی۔ کئی افراد اسے حکومت کی جانب سے کسی کارروائی کا آغاز سمجھنے لگے۔ بڑی تعداد میں طلبہ ڈنڈے اٹھا کر کسی بھی صورتحال سے نمٹنے کے لیے تیار ہوگئے۔

ادھر پولیس نے بھی مدرسے کو جانے والی سڑک طلبہ کی جانب سے کسی جلوس کے خدشے کے پیش نظر مختصر مدت کے لیے بند کر دی۔ تاہم ہیلی کاپٹر کے جانے کے بعد مقامی لوگوں کی تشویش میں کمی آئی، سڑک کھول دی گئی اور حالات جلد معمول پر آگئے۔

لال مسجد کے نائب مہتمم عبدالرشید غازی نے بعد میں بی بی سی سے بات کرتے ہوئے دھمکی دی کہ حکومت کی جانب سے اس قسم کے اقدامات کی صورت میں مذاکرات کو جاری رکھنا ناممکن ہوجائے گا۔

اس واقعے کی تفصیل بتاتے ہوئے انہوں نے الزام لگایا کہ فوجی ہیلی کاپٹر میں سوار دو میں سے ایک فوجی مدرسے کی بیس منٹ تک عکس بندی کرتا رہا۔ ان کا کہنا تھا کہ اس دوران اس نے اتنی نیچی پرواز کی کہ مدرسے میں موجود طالبات کی سانس بند ہونے لگی۔ انہوں نے ہیلی کاپٹر کی جانب سے کوئی گیس پھینکنے کا الزام بھی لگایا۔

اس واقعہ پر ابھی کوئی باقاعدہ سرکاری ردِعمل سامنے نہیں آیا ہے تاہم حکمراں مسلم لیگ کے سربراہ چودھری شجاعت حسین نے ٹیلیفون پر عبدالرشید غازی سے بات کی۔

یورپ میں کارٹونوں کی اشاعت کے معاملے پر تو الطاف حسین خاموش رہے لیکن اس معاملے پر بڑھ چڑھ کر بول رہے ہیں۔ انہیں یہ بھی نہیں معلوم کہ یہ مدرسہ حفصہ ہے مسجد حفصہ نہیں لال مسجد کے نائب مہتمم عبدالرشید غازی

اس پرواز کے مقاصد کے بارے میں عبدالرشید کا کہنا تھا کہ یہ متحدہ قومی موومنٹ کے اتوار کے کراچی میں جلسہ عام کا نتیجہ ہوسکتا ہے۔ انہوں نے اس موقع پر ایم کیو ایم کے سربراہ الطاف حسین پر شدید تنقید کی۔

ان کا کہنا تھا کہ یورپ میں کارٹونوں کی اشاعت کے معاملے پر تو الطاف حسین خاموش رہے لیکن اس معاملے پر بڑھ چڑھ کر بول رہے ہیں۔ انہوں نے کہا کہ انہیں یہ بھی نہیں معلوم کہ یہ مدرسہ حفصہ ہے مسجد حفصہ نہیں۔

نائب مہتمم نے حکومت سے ہیلی کاپٹر سے بنائی جانے والی ویڈیو فلم واپس کرنے کا مطالبہ کیا۔ لال مسجد میں پیدا ہونے والی آج کی صورتحال سے ظاہر ہوتا ہے کہ حکومت کے ساتھ ’مثبت‘ مذاکرات کے باوجود معاملہ ابھی پوری طرح سے حل نہیں ہوا ہے۔ کئی لوگوں نے یہ قیاس کرنا شروع کر دیا ہے کہ خفیہ ادارے اس ویڈیو کے ذریعے مدرسے کے اندر کی صورتحال جاننا چاہتے تھے تاکہ سکیورٹی فورسز موثر کارروائی کر سکیں۔