بیورو رپورٹ بی بی سی اردو ڈاٹ کام، اسلام آباد

	جسٹس افتخار سپریم کورٹ پیدل جانا چاہتے تھے

ترمیمی فرد جرم اس وقت عائد کی گئی جب سماعت کے دوران اٹارنی جنرل آف پاکستان مخدوم علی خان نے تین رکنی بینچ کے سامنے اس بات کی نشاندہی کی کہ پچھلی سماعت میں اسلام آباد ضلعی انتظامیہ اور پولیس افسران پر جو فرد جرم عائد کی گئی تھی وہ توہین عدالت ایکٹ اُنیس سو چھہتر کے تحت تھی جو دو ہزار تین میں توہین عدالت کا نیا آرڈیننس آجانے کے بعد غیر موثر ہو گیا ہے۔

انہوں نے مزید بتایا کہ سترہویں ترامیم کے تحت جن قوانین کو آئینی تحفظ فراہم کیا گیا تھا ان میں توہین عدالت آرڈینسن دو ہزار تین بھی شامل ہے۔ جس کے تحت توہین عدالت کی تین صورتیں بیان کی گئی ہیں۔ نمبر ایک فوجداری توہین عدالت، دو سول توہین عدالت اور تیسری جوڈیشل توہین عدالت۔

اب یہ عدالت پر منحصر ہے کہ وہ کس صورت کا تعین کرتی ہے اور کس کے تحت فرد جرم عائد کرتی ہے۔

اس پر عدالت نے کہا کہ اگر ملزمان چاہیں تو اپنے جوابات کو نئی وضاحت کی روشنی میں عدالت کو تحریری طور پر پیش کر سکتے ہیں۔

	جسٹس چودھری افتخار کو سپریم کورٹ آتے ہوئے پولیس کا سامنا کرنا پڑا تھا

آج آئی جی، چیف کمشنر اور ایس ایس پی کی طرف سے ایڈوکیٹ مجیب الرحمان پیش ہوئے۔ ملزمان رخسار مہدی اور آئی جی کے سیکورٹی گارڈ سراج احمد کی طرف سے قاضی محمد امین جبکہ ڈپٹی کمشنر کی طرف سے راجہ بشیر ایڈوکیٹ جبکہ ڈی ایس پی جمیل ہاشمی کی طرف سے راجہ ابراہیم ستی ایڈوکیٹ پیش ہوئے۔

کارروائی کے دوران ایڈوکیٹ قاضی محمد امین نے کہا کہ وہ نئی فرد جرم سے کوئی فائدہ نہیں اٹھانا چاہتے بلکہ خود کو عدالت کے رحم و کرم پر چھوڑتے ہیں۔

تاہم جمیل ہاشمی کے وکیل راجہ ابراہیم نے کہا کہ عدالت نے جو فرد جرم عائد کی ہے اس میں کئی نقائص ہیں۔ اس کے باوجود بھی عدالت کا احترام کرتے ہوئے غیر مشروط معافی مانگتے ہیں۔

اس پر عدالت نے جیمل ہاشمی کے وکیل سے کہا کہ انہوں جو کچھ کہنا ہے وہ تحریری طور پر داخل کریں۔

عدالت عظمی نے ملزمان کے وکلا کی طرف سے غیر مشروط معافی مانگنے اور اٹارنی جنرل کی طرف سے اعتراضات اُٹھانے پر فرد جرم ارسر نو عائد کرتے ہوئے مزید سماعت پچیس اپریل تک ملتوی کر دی۔ واضح رہے کہ تیرہ مارچ کو جب معطل چیف جسٹس افتخار محمد چودھری نے سپریم جوڈیشل کونسل سامنے پیشی کے لیے اپنے گھر سے سپریم کورٹ تک پیدل جانے پر اصرار کیا تو سکیورٹی اہلکاروں نے انہیں گاڑی میں بٹھانے کی کوشش کی تھی اور اسی دوران چیف جسٹس کے ساتھ مبینہ بدسلوکی کا واقعہ پیش آیا تھا۔ اس وقت کے سپریم کورٹ کے قائم مقام چیف جسٹس جاوید اقبال نے اس واقعہ کا از خود نوٹس لیتے ہوئے پشاور ہائی کورٹ کے جج اعجاز افصل خان کو انکوائری جج مقرر کیا تھا اور ان کی جانچ مکمل ہونے کے بعد توہین عدالت کے اس مقدمے کی سماعت شروع ہوئی۔

معطل چیف جسٹس افتخار محمد چوہدری کے ساتھ مبینہ بدسلوکی کی تفتیش کرنے والا سپریم کورٹ کا بینچ قائم مقام چیف جسٹس رانا بھگوان داس، جسٹس تصدق حیسن جیلانی اور جسٹس ناصرالملک پر مشتعمل ہے۔