رفعت اللہ اورکزئی بی بی سی اردو ڈاٹ کام، پشاور

	اکتوبر 2005 کے زلزلے کے بعد سے یہ علاقہ ارضیاتی تبدیلیوں کی زد میں ہے

پولیس کے مطابق یہ واقعہ بالائی چترال کے دورافتادہ علاقہ تورکوہ گاؤں واشیج میں سنیچر اور اتوار کی درمیانی رات اس وقت پیش آیا جب دو دن سے جاری بارشوں اور برف باری کی وجہ سے قریبی پہاڑوں سے ایک بڑا برفانی تودہ مقامی آبادی پر آ گرا جس سے تقریباً چھبیس گھر دب گئے۔

چترال کے سپرٹنڈنٹ پولیس اعجاز احمد نے بی بی سی اردو کو بتایا کہ اب تک تئیس افراد کی لاشیں نکالی جا چکی ہیں جبکہ چھ افراد زخمی ہوئے ہیں جن میں تین کی حالت تشویش ناک بتائی جاتی ہے۔ انہوں نے کہا کہ تیرہ افراد بدستور لاپتہ ہیں جن کی تلاش کا کام جاری ہے اور ہلاکتوں کی تعداد میں مزید اضافہ ہو سکتا ہے۔

ان کا کہنا تھا کہ اگر پولیس اور مقامی لوگ امدادی کاموں میں حصہ لے رہے لیکن برف باری اور تودے گرنے کے واقعات کے سبب چترال کی تقریباً تمام سڑکیں اور راستے بند ہیں اور اس وجہ سے لوگوں کو نکالنے اور طبی امداد کی فراہمی میں شدید مشکلات پیش آ رہی ہیں۔

اعجاز احمد نے بتایا کہ چترال کی انتظامیہ نے امدادی کاموں کے لیے صوبائی حکومت اور غیر سرکاری تنظیموں سے ہیلی کاپٹر طلب کیے ہیں۔

چترال کے مقامی صحافی گل حماد فاروقی کے مطابق اگر علاقے میں ہیلی کاپٹر فوری طور پر نہیں پہنچائےگئے تو مزید ہلاکتیں ہو سکتی ہیں۔ انہوں نے بتایا کہ برف باری اور بارش سے علاقے میں مواصلات کا نظام درہم برہم ہوا ہے اور متاثرہ علاقے سے وائرلیس کے ذریعے اطلاعات مل رہی ہیں۔