عدنان عادل بی بی سی اردو ڈاٹ کام، لاہور

	غلام سرور نے ابتدائی طور پر کہا تھا کہ اس نے ظل ہما کو قتل کرکے جہاد کیا ہے

گزشتہ ماہ بیس فروری کو ظل ہما کو اس وقت گولی مار دی گئی تھی جب وہ گوجرانوالہ میں مسلم لیگ ہاؤس میں کارکنوں سے ملاقات کر رہی تھیں۔ موقع پر موجود لوگوں نے اسی وقت غلام سرور کو گولی مارنے کے الزام میں پکڑ کر پولیس کے حوالہ کر دیا تھا۔

پنجاب کی صوبائی وزیر ظلِ ہما قتل

’خاتون وزیر کو قتل کر کے جہاد کیا ہے‘

منگل کوگوجرانوالہ میں انسداد دہشت گردی کی عدالت کے جج عارف افتخار احمد نے ملزم پر قتل کا جرم ثابت ہونے اور انسداد دہشت گردی کی دفعہ سات کے تحت دو بار سزائے موت سنانے کا حکم دیا۔

جج نے غلام سرور کو دو سال قید، ایک لاکھ روپے جرمانہ اور ظل ہما کے ورثاء کو ایک لاکھ روپے معاوضہ ادا کرنے کا حکم بھی دیا۔

پینتالیس سالہ مجرم غلام سرور کے خلاف استغاثہ نے سولہ گواہ پیش کیے تھے جن میں آٹھ پولیس اہلکار، تین ڈاکٹر، ایک نقشہ نویس اور چار عام شہری تھے۔

غلام سرور نے ابتدائی طور پر جج کے سامنے اعتراف جرم کرتے ہوئے کہا تھا کہ اس نے ظل ہما کو قتل کرکے جہاد کیا ہے لیکن بعد میں وہ اپنے اعترافی بیان سے منحرف ہوگیا تھا۔

غلام سرور کی طرف سے صفائی کے لیے پیش ہونے والے حکومت کے مقرر کردہ وکیل طارق محمود نے جج سے کہا تھا کہ پولیس کے دباؤ کی وجہ سے صفائی کے گواہ پیش نہیں ہوئے اور غلام سرور کے ورثا بھی عدالت میں نہیں آسکے۔

غلام سرور نے سزا سننے کے بعد جیل جاتے ہوئے صحافیوں کی طرف دیکھ کر انگلیوں سے وکٹری کا نشان بنایا۔

چند سال پہلے بھی غلام سرور پر چار عورتوں کے قتل کا الزام لگایا گیا تھا لیکن اسے مدعیوں کے دستبردار ہوجانے کی وجہ سے سزا نہیں ہوسکی تھی اور اسے ہیرو کے طور پر استقبال کرکے جیل سے گھر لایا گیا تھا۔

غلام سرور نو بچوں کا باپ ہے اور گوجرانوالہ میں ایک دکان چلاتا تھا۔

صوبائی وزیر ظل ہما کے قتل کا فیصلہ عدالت نے اٹھائیس دنوں میں سنایا ہے جو ملک کی تاریخ میں تیز ترین سماعت کیے جانے والا مقدمہ کہا جاسکتا ہے۔