ریاض سہیل بی بی سی اردو ڈاٹ کام، کراچی

	مظاہرے میں این جی اوز کے کارکن بھی شامل تھے

پریس کلب سے نکلنے والی اس ریلی کی قیادت کراچی پریس کلب کے صدر صبیح الدین غوثی، پاکستان فیڈرل یونین آف جرنلسٹ کے سکریٹری جنرل مظہر عباس اور ایسوسی ایشن آف ٹیلیویژن جرنلسٹ کے صدر جاوید صبا اور فیصل عزیز کر رہے تھے۔

مظاہرے میں شامل صحافی آزادی صحافت، میڈیا پر حملے نامنظور، حیات اللہ اور منیر سانگی کے قاتلوں کوگرفتار کرو، کے نعرے لگاتے ہوئے ریگل چوک پہنچے، جہاں مختلف این جی اوز کے کارکن اس احتجاج میں شامل ہوگئے۔ این جی اوز کے کارکن عراق پر امریکی قبضے کے خلاف احتجاج کر رہے تھے ۔

مظاہرین زیب النسا اسٹریٹ سے ہوتے ہوئے پریس کلب پہنچے جہاں ریلی کا اختتام کیا گیا۔

دوسری جانب نجی چینل جیو نیوز کے پروگرام’ آج کامران خان کے ساتھ‘ سے حکومت نے پابندی ہٹا دی ہے۔ اس پروگرام میں پیر کو صدر جنرل پرویز مشرف کا انٹرویو نشر کیا جارہا ہے۔

واضح رہے کہ پروگرام کے میزبان کامران خان کا کہنا تھا کہ چیف جسٹس افتخار محمد چودھری کی معطلی اور اس پر ہونے والے احتجاج کی ویڈیو دکھانے پر حکومت نے تجزیوں اور تبصروں پر مشتمل اس پروگرام پر پابندی عائد کردی تھی۔