پیر کو چیف جسٹس کے گھر جانے والے راستوں سے پولیس کو ہٹا لیا گیا

صدر جنرل پرویز مشرف کی طرف سے جسٹس افتخار محمد چوہدری کومعطل کیے جانے کے بعد انہیں سخت حفاظتی حصار میں رکھا گیا تھا اور کسی شخص کو جسٹس افتخار کے گھر کی طرف سے جانے کی اجازت نہ تھی۔

سپریم جوڈیشل کونسل نے جسٹس افتخار پر سے تمام پابندیاں اٹھانے کا حکم جاری کیا تھا لیکن کونسل کے حکم کے باجود چوبیس گھنٹے تک ججز کالونی کو جانے والے راستے پر پولیس اہلکار موجود رہے اور کسی کو جسٹس افتخار کے گھر کے قریب بھی جانے کی اجازت نہ تھی۔

البتہ پیر کو چیف جسٹس کے گھر جانے والے راستوں سے پولیس کو ہٹا لیا گیا اور اب کوئی بھی شخص جسٹس افتخار کے گھر کے بیرونی دورازے پر جا کر ملنے کی درخواست کر سکتا ہے۔

پیر کو بلوچستان ہاؤس کے سامنے سے بھی پولیس چوکی ہٹا لی گئی ہےاور کوئی بھی شخص بغیر کسی رکاوٹ کے جسٹس افتخار محمد چوہدری کی رہائش گاہ کے بیرونی دروازے تک پہنچ سکتا ہے۔

جسٹس افتخار کے گھر کے بیرونی دروازے پر پولیس اہلکار موجود ہیں اور وہ ملاقات کے خواہشمند لوگوں کا تعارفی کارڈ چیف جسٹس تک پہنچاتے ہیں اور اگر معطل چیف جسٹس ملنا چاہیں تو وہ ان کو اندر جانے دیتے ہیں۔

پیر کو جب اس نامہ نگار نے جسٹس افتخار سے ملاقات کی کوشش تو انہوں نے یہ کہہ کر انکار کر دیا کہ وہ جج ہیں اور صحافیوں سے ملاقات نہیں کرتے۔

چیف جسٹس افتخار نے اسلام آباد کے تین وکلاء سے بیس منٹ تک ملاقات کی۔