عدنان عادل
بی بی سی اردو ڈاٹ کام، لاہور |  |
| | | رِٹ درخواست پرجیو ٹی وی اور اے آر وائی ون ورلڈ کو ابھی نوٹس جاری نہیں کیے گئے ہیں |
لاہور ہائی کورٹ نے سوموار کو ایک مقامی وکیل کی ایک رِٹ درخواست سماعت کے لیے منظور کر لی ہے جس میں کہا گیا ہے کہ عدلیہ اور فوج کو بدنام کرنے کے الزامات کے تحت دو نجی ٹی وی چینلوں جیو اور اے آر وائی ون ورلڈ کے خلاف کارروائی کی جائے۔ رِٹ درخواست میں کہا گیا ہے کہ مذکورہ ٹی وی چینلز معطل کیے گئے ملک کے چیف جسٹس افتخار محمد چودھری کے خلاف صدر کے ریفرنس پر ملکی قوانین کے خلاف خبریں، تبصرے اور انٹرویو نشر کررہے ہیں جس کے سبب ان کے خلاف کارروائی کی جائے اور ان کے لائسنس منسوخ کردیے جائیں۔ لاہور ہائی کورٹ کے جج حامد علی شاہ نے وکیل محمد ارشد کی جانب سے دائر کی گئی رِٹ درخواست سماعت کے لیے منظور کرتے ہوئے چیف جسٹس لاہور ہائی کورٹ سے کہا ہے کہ وہ اس کی باقاعدہ سماعت کے لیے ایک بڑا دو رکنی بینچ تشکیل دیں۔ جج نے اس رِٹ درخواست پر فریق بنائے گئے وفاقِ پاکستان اور پاکستان الیکٹرانک ریگولیٹری اتھارٹی (پمرا) کو نوٹس بھی جاری کردیے ہیں جبکہ دو مدعا علیہان جیو ٹی وی اور اے آر وائی ون ورلڈ کو ابھی نوٹس جاری نہیں کیے گئے ہیں۔ درخواست گزار نے عدالت عالیہ سے کہا ہے کہ انہیں یہ دیکھ کر صدمہ ہوا ہے کہ ان دنوں مختلف ٹی وی چینلوں پر حالات حاضرہ اور خصوصاً چیف جسٹس افتخار محمد چودھری کے خلاف پیش کیے گئے صدارتی ریفرنس پر تحقیر آمیز اطلاعات نشر ہو رہے ہیں۔ درخواست گزار کا کہنا ہے کہ تمام ٹی وی چینلز مختلف حیلوں سے ملک کے دو اعلیٰ ترین اداروں یعنی عدلیہ اور فوج کو بدنام کرنے میں ایک دوسرے سے سبقت لے جانے کی کوشش کررہے ہیں۔ درخواست گزار نے عدالت عالیہ سے کہا ہے کہ اس نے پمرا کو ٹیلی فون کے ذریعے ان چینلوں کے خلاف کاروائی کرنے کی درخواست دی تھی لیکن اس کا کوئی حاصل نہیں نکلا اس لیے اب وہ عدالت عالیہ سے رجوع کر رہا ہے۔ درخواست میں کہا گیا ہے کہ پمرا آرڈیننس سنہ دو ہزار دو کی شق تینتیس کے تحت جیو اور اے آر وائی اور ایسے دوسرے ٹی وی چینلوں کے خلاف تادیبی کاروائی کی جائے اور شق تیس کے تحت ان کے لائسنس منسوخ کیے جائیں۔ | 
سندھ میں کیبل آپریٹروں کی ہڑتال 
