ریاض سہیل بی بی سی اردو ڈاٹ کام، کراچی

	مختلف سیاسی گروہوں نے کانفرنس کو دکھاوا قرار دیا

پی پی پی کے رہنما اور صوبائی اسمبلی میں قائد حزب اختلاف نثار کھوڑو کا کہنا ہے کہ یہ کانفرنس ایک ڈرامہ ہے جس میں پی پی پی شریک نہیں ہوگی۔

عوامی تحریک کے سربراہ رسول بخش پلیجو نے اس کانفرنس کو اچھی کوشش قرار دیا مگر کہا کہ یہ فوجی حکومت میں ہو رہی ہے جس میں صرف نمائشی باتیں ہوں گی، عمل نہیں ہوگا۔

ان کا کہنا تھا کہ مرکز کے پاس صرف تین محکمے ہونے چاہیں باقی تمام محکمے صوبوں کے حوالے کیے جائیں۔ ’اس وقت ہم لوگ مرکز کے غلام ہیں اس میں صوبائی خود مختاری کا لفظ اچھا ہے مگر اس کی معنی کچھ نہیں ہیں‘۔

جی ایم سید کی فکر کہ پیروکار جئے سندھ قومی محاذ کے چئرمین شبیر قریشی کا کہنا ہے کہ انہیں بھیک نہیں چا ہیے، سرزمین اور اس کی پیداوار کے مالک سندھی ہیں ۔ یہاں سے نکلنے والے تیل، گیس اور سمندر کی پیداوار پر سندھ کا حق مالکیت تسلیم کیا جائے۔ ان کے مطابق وہ سندھ کی آزاد حیثیت کے لیے کوشش کر رہے ہیں۔

جماعت اسلامی سندھ کے امیر مولانا اسداللہ بھٹو کا کہنا تھا کہ ’حکمران ٹولے کا رویہ سنجیدہ نہیں ہے‘۔ اس سے قبل بلوچستان کے مسئلے پر قومی اسمبلی کی ایک پارلیمانی کمیٹی بنائی گئی تھی جسے صوبائی خود مختاری کے حوالے سے تجاویز دینی تھیں مگر آج تک ایوان میں اس کی رپورٹ پیش نہیں کی گئی ہے۔
ان کا کہنا تھا کہ یہ کانفرنس صرف دکھاوے کے لیے ہے۔ انہوں نے کہا کہ صوبائی خود مختاری کی راہ میں صدر مشرف کی وردی رکاوٹ ہے کیونکہ اس وردی کی وجہ سے صوبوں کے تمام اختیارات مفلوج ہوچکے ہیں۔

کانفرنس کا انتظام سندھ کے محکمہ برائے بین الصوبائی امور نے کیا ہے۔ اس محکمے کے وزیر سہراب سرکی کا کہنا ہے کہ یہ ایک اہم اور حساس مسئلہ ہے۔ انہوں نے سندھ کی تمام سیاسی جماعتوں کو اس کانفرنس میں مدعو کرکے اپنا فرض پورا کیا ہے اب ان کی مرضی ہے شریک ہوں نہ ہوں ۔

انہوں نے بتایا کہ اس کانفرنس میں جو بھی تجاویز ملیں گی ان کو وفاقی حکومت کے حوالے کیا جائے گا۔ صوبائی خود مختاری کے حوالے سے وفاقی حکومت نے صوبوں سے تجاویز طلب کی تھیں، سندھ حکومت نے پہل کرتے ہوئے یہ کانفرنس طلب کی ہے، جس میں انہیں دشواری کا سامنا کرنا پڑا ہے۔

قوم پرست جماعتوں کے اتحاد پونم کے سربراہ محمود اچکزئی نےصوبائی نے خود مختاری کی اس بحث کو انتخابی مہم کا حصہ قرار دیا ہے اور کہا ہے کہ اس سے مظلوم قوموں کے احساس محرومی میں اضافہ ہوگا۔