ہارون رشید بی بی سی اردو ڈاٹ کام، پشاور

	سرحد کنزرویشن نیٹ ورک نے صوبے میں تمام قدیم اور اہم عمارتوں کو ٹھیکیدار مافیا سے بچانے کی خاطر انہیں آثار قدیمہ قرار دینے کا مطالبہ کیا ہے۔

محکمہ کے ڈائریکٹر محمد بہادر خان نے بی بی سی کو بتایا کہ حکومت نے اس قدیم عمارت کے بارے میں یہ اعلان اٹھائیس فروری کو کیا تھا۔

تاہم اس وقت پشاور کے مصروف صدر روڈ پر قائم فلک سیر سینما کی عمارت کو گرائے جانے کا عمل پوری تیزی کے ساتھ جاری تھا۔

انیس سو تیس کی دہائی میں انگریزوں کے دورے اقتدار میں یہ عمارت لینز ڈون تھیٹر کے نام سے تعمیر ہوئی تھی۔

وفاقی حکومت نے یہ قدم پشاور میں آثار قدیمہ اور ثقافت کی تحفظ کے لیے کام کرنے والے کارکنوں کی کوششوں کے بعد اٹھایا۔

سرحد کنزویشن نیٹ ورک کے جنرل سیکٹری عادل ظریف نے اسے تاخیری اقدام قرار دیا لیکن اس کی تعریف بھی کی اور متعلقہ حکام سے مطالبہ کیا کہ حکم کی خلاف ورزی کرنے والوں کے خلاف سخت اقدامات جن میں جرمانہ شامل ہیں اٹھائیں جائیں اور اس رقم سے اس عمارت کو دوبارہ بحال کیا جائے۔

وزارت آثار قدیمہ کے ڈائریکٹر محمد بہادر خان نے بھی تسلیم کیا کہ یہ اقدام تاخیر سے اٹھایا گیا ہے لیکن انہوں نے اس کی ذمہ داری کنٹونمنٹ بورڈ حکام پر ڈالی۔ ان کا کہنا تھا کہ انہوں نے بورڈ سے دو فروری کو اس عمارت کا ریونیو ریکارڈ طلب کیا تھا۔

وزارت کو پشاور چھاؤنی میں حکام نے یہ ریکارڈ یکم مارچ کو فراہم کیا۔ بہادر خان کا کہنا تھا کہ انہوں نے حالات کی نزاکت دیکھتے ہوئے ریکارڈ کا انتظار کیے بغیر اٹھائیس فروری کو ہی یہ عمارت محفوظ قرار دے دی تھی۔

وزارت نے مزید کارروائی کے لیے یہ اعلان نامہ چھاؤنی بورڈ، سٹیشن کمانڈر اور پولیس کو فراہم کر دیا ہے۔ ’کم از کم اتنا ہو جائے کہ اس عمارت کا باہر کا حصہ بچ جائے۔ اس بابت مزید کارروائی کا مجھے ابھی علم نہیں ہے‘۔

پشاور صدر میں اس عمارت کے بچانے میں تو تاخیر ہوئی ہے تاہم اس سے ایک اور عمارت کے بچ جانے کی امید بھی بڑھی ہے۔ بہادر خان نے بتایا کہ ایک دو روز میں صدر میں ہی کیپٹل سینما کی عمارت کے بارے میں بھی اعلامیہ جاری کر دیا جائے گا۔

سمینا مالکان نے ذرائع ابلاغ کے فلک سیر سینما میں داخلے پر پابندی لگا رکھی ہے۔

سرحد کنزرویشن نیٹ ورک نے صوبے میں تمام قدیم اور اہم عمارتوں کو ٹھیکیدار مافیا سے بچانے کی خاطر انہیں آثار قدیمہ قرار دینے کا مطالبہ کیا ہے۔