ریاض سہیل بی بی سی اردوڈاٹ کام کراچی

	مقتول کے والد بلوچستان سے سینیٹ کے رکن رہ چکے ہیں

پولیس کا کہنا ہے کہ ظہیر نے بلوچستان میں پسند کی شادی کے بعد کراچی میں رہائش اختیار کرلی تھی۔

شہر کے علاقے گلستان جوہر میں پولیس کے مطابق ظہیر بلوچ پر اس وقت فائر نگ کی گئی جب وہ اپنی کار میں گھر سے کہیں جارہے تھے۔

پولیس کے مطابق ایک کار میں سوار تین افراد نے ظہیر کی گاڑی کو روکا اس میں سے ایک نے اتر کر اس پر فائرنگ کی جس میں وہ شدید زخمی ہوگیا اور ہسپتال جاتے ہوئے دم توڑ دیا۔ ڈاکٹروں کے مطابق اس کو تین گولیاں لگی ہیں۔

گلستان جوہر کے تھانیدار محمد وسیم کا کہنا ہے کہ ظہیر نے کچھ عرصے قبل بلوچستان میں پسند کی شادی کی تھی جس کے بعد وہ وہاں سے کراچی منتقل ہوگیا تھا اور یہاں ایک فلیٹ میں رہتا تھا۔

پولیس کا کہنا ہے کہ اس شادی سے لڑکی کے خاندان والے ناراض تھے۔ ظہیر کے والد مہیم خان کا تعلق بلوچستان نیشنل پارٹی سے رہا ہے اور وہ سینیٹر رہے ہیں۔

واقعے کا مقدمہ دائر نہیں کیا گیا تھا، پولیس کا کہنا کے مقتول کے ورثا کراچی آ رہے ہیں۔