ریاض سہیل بی بی سی اردو ڈاٹ کام، کراچی

	سمجھوتہ ایکسپریس پر سوار کراچی سے تعلق رکھنے والے مسافروں کا کینٹ سٹیشن پر انتظار

لاہور سے زخمیوں اور دیگر مسافروں کی منگل کو بذریعہ ٹرین کراچی آنے کی اطلاع پر لوگوں کی ایک بڑی تعداد کینٹ ریلوے سٹیشن پر پہنچ گئی۔

محمد اکبر اپنی اہلیہ کے ہمراہ اپنی والدہ اور ماموں کو لینے آئے ہوئے تھے۔ انہوں نے بتایا گزشتہ رات ساڑھے دس بجے ان کا ماموں سے رابطہ ہوا تھا، جنہوں نے بتایا کہ وہ اور والدہ دونوں زخمی ہیں۔ ان کا کہنا تھا کہ اس سے قبل انہوں نے ہندوستان میں اپنے رشتہ داروں سے رابطہ کیا اور کراچی کینٹ سٹیشن کے کئی چکر لگائے مگر کچھ معلوم نہیں ہو رہا تھا۔

محمد رشید اپنی والدہ اور چھوٹی بہن کو لینے آئے ہوئے تھے۔ ان کا کہنا تھا کہ ساری رات پریشانی میں جاگ کر گزاری ہے، کھانا پینے کو دل نہیں چاہ رہا۔ ’جب تک ماں اور بہن کو سامنے نہیں دیکھ لیتا سکون نہیں آئے گا‘۔

انہوں نے الزام لگایا کہ ہندوستان کی پولیس ناکارہ ہے۔ انہوں نے بتایا کہ ایک ماہ پہلے وہ بھی ہندوستان گئے تھے اور واپسی پر دلی سٹیشن پر پولیس والوں نے روکا اور پوچھا کہ بیگ میں کیا ہے، اس کے بعد انہوں نے ایک آلے کی مدد سے بے دھیانی کے ساتھ تلاشی لیتے ہوئے دس روپے مانگ لیے۔ ’جہاں پیسہ اور رشوت چلے گی وہاں تو کچھ بھی ہوسکتا‘۔

	زخمیوں کو ہسپتال تک لے جانے کے لیے بڑی تعداد میں ایمبولینس بھی موجود تھیں

اسٹشین پر ایک خاتون بھی موجود تھیں جو اپنی چھوٹی بہن کو لینے آئی ہوئی تھیں۔ انہوں نے بتایا کہ رات کو تین بجے ٹی وی پر حادثے کی خبر سننے کے بعد سے ان کا سارا وقت پریشانی میں گذرا ہے اور ابھی تک بہن سے براہ راست کوئی رابطہ نہیں پایا، بس بعض رشتہ داروں سے سنا ہے کہ وہ خیریت سے ہے۔

محمد سلیم پورے خاندان کے ساتھ چھوٹے بھائی کو لینے آئے ہوئے تھے اور بھائی کی خیریت کی اطلاع پانے پر مطمئن نظر آرہے تھے۔ انہوں نے بتایا کہ پیر کو وہ سارا دن ٹی وی کےسامنے بیٹھے رہے اور بھائی کی خیریت کے لیے دعا کرتے رہے۔

کینٹ سٹیشن پر سکاؤٹس نے کیمپ لگایا ہوا تھا جبکہ زخمیوں کو ہسپتال تک لے جانے کے لیے بڑی تعداد میں ایمبولینس بھی موجود تھیں۔