عبدالحئی کاکڑ بی بی سی اردو ڈاٹ کام ،پشاور

	ہنگو میں عاشور کے روز کرفیو نافذ کیا گیا تھا

ہنگو کے ناظم غنی الرحمن نے بی بی سی کو بتایا کہ اہل تشیع اور اہل سنت کے رہنماؤں کے درمیان مذاکرات میں پیش رفت ہوئی ہے اور فریقین نے بارہ رکنی جرگے کو فیصلہ کرنے کا اختیار دیا ہے۔ ان کے بقول فریقین نے جرگے کے ساتھ ایک ایک کروڑ روپے بطور ضمانت جمع کئے ہیں۔

ضلعی ناظم کا مزید کہنا تھا کہ شہر میں عاشورہ کے دن سے بند سکول جمعہ کودوبارہ کھل گئے تھے جبکہ ہنگو بازار بھی مکمل طور پر کھلا ہوا ہے تاہم بارش کی وجہ سے بازار میں لوگوں کا رش کم ہے۔

غنی الرحمن کا کہنا تھا کہ شہر میں ممکنہ خود کش حملوں کی افواہیں گردش کر رہی ہیں جسکی وجہ سے حکومت نے کچھ دنوں تک ہنگو میں فوج کی موجودگی کا فیصلہ کیا ہے۔

واضح رہے کہ عاشورہ کی صبح ہنگو میں قومی امام بارگاہ کے سامنے راکٹ گرنے اور اس کے بعد فائرنگ کے واقعات میں دو افراد ہلاک جبکہ چودہ زخمی ہوگئے تھے جس کے فوری بعد شہر کو فوج کے حوالے کر کے وہاں کرفیو نافذ کر دیا گیا تھا۔

اورکزئی ایجنسی کا بارہ رکنی مصالحتی جرگہ پیر کے روز سے اپنا کام شروع کرے گا۔