ریاض سہیل بی بی سی اردو ڈاٹ کام، کراچی

	کراچی میں محرم کے جلوس کے لیے سخت حفاظتی بند وبست کیے گیے ہیں

جب محفل شاہ خراساں سے جلوس نکلا تو پولیس اور رینجرز کے جوان گشت کر رہے تھے اور جلوس کے راستے یعنی محمد علی جناح روڈ کی طرف نکلنے والی تمام سڑکوں اور گلیوں کی مکمل ناکہ بندی کی گئی تھی۔

ایم اے جناح روڈ پر واقع بڑی عمارتوں کی چھتوں پر بھی رینجرز کے اہلکار تعینات تھے اور ایک ہیلی کاپٹر بھی فضا سے نگرانی کر رہا تھا۔

تین لاپتہ شیعہ نوجوانوں کے اہل خانہ اور شیعہ تنظیموں نے ایم اے جناح روڈ پر احتجاجی دہرنا دیا اور لاپتہ افراد کی رہائی کا مطالبہ کیا۔ امام بارگاہ علی رضا کے سامنے لاپتہ نوجوانوں کی رشتے دار خواتین اور بچے ہاتھوں میں بینر اور پلے کارڈ لیکر بیٹھے۔اس دھرنے کی وجہ سے نویں محرم الحرام کا جلوس کئی گھنٹے تک رک گیا۔

اس دھرنےکو مرزا یوسف حسین نے خطاب کرتے ہوئے کہا کہ انہوں نے گورنر ہاؤس میں وزیر اعظم کو ایک ملاقات میں بتایا تھا کہ ان کے تین سنجیدہ اور پڑھ لکھے نوجوان سات ماہ لا پتہ ہیں، جن کے بارے میں آج تک یہ نہیں بتایا جاتا کہ وہ کہاں اور کس حال میں ہیں۔

ان کے مطابق وزیر اعظم نے اسی وقت نوجوانوں کے نام لیکر اپنے سیکریٹری کو ہدایت کی کہ ان کے بارے میں معلوم کرکے بتایا جائے۔

مرزا یوسف کے مطابق وزارت داخلہ نے اعتراف کیا ہے کہ ڈاکٹر علی رضا ان کی تحویل میں ہیں تاہم ممتاز حسین اور عمران شاہ کے بارے میں کچھ نہیں بتایا گیا کہ وہ کس حال میں اور کہاں ہیں۔

اس دھرنے کے دوران کراچی کی نائب ناظمہ نسرین جلیل بھی پہنچیں اور کہا کہ گورنر سندھ حکام سے رابطے میں ہیں اور لاپتہ افراد کے بارے میں معلوم کرکے بتایا جائیگا اس لیے دھرنا ختم کیا جائے۔ان کی اس بات پر نوجوان مشتعل ہوگئے اور نعرے لگائے، صورتحال کشیدہ ہونے کے بعد محافظ نسرین جلیل کو مجمع سے باہر لے گئے۔

ڈاکٹر علی رضا کی بیگم نے دھرنے کو خطاب کرتے ہوئے کہا کہ کورکمانڈر اور گورنر کو انہوں نے مہلت دی کہ اگر چوبیس گھنٹوں کے اندر اسیروں کے بارے میں اطلاع نہیں دی گئی تو عاشورہ کا ماتمی جلوس یہاں سے آگے نہیں بڑھےگا، جس کے بعد دھرنے کو ختم کر دیا گیا۔