مشرف نے برسلس میں یورپی پارلیامان کے اراکین کو خطاب کیا

برسلس میں یورپی پارلیمان کے اراکین کو خطاب کرتے ہوئے مشرف نے کہا کہ القاعدہ کے برعکس طالبان کو زیادہ عوامی حمایت حاصل ہے جو قومی سطح پر ٹکراؤ کا سبب بن سکتا ہے۔

اس تنقید کے جواب میں جس میں پرویز مشرف پر یہ الزام لگایا گیاہے کہ وہ سرحد پر انتہا پسندی کو قابو کرنے کے مناسب اقدام کرنےمیں ناکام رہے ہیں، انہوں نے کہا کہ ان کی حکومت نے سرحد پر پچاس ہزار فوجی تعینات کر رکھا ہے اور اب تک چار سو فوجی جاں بحق ہو چکے ہیں۔

پرویز مشرف نے مغرب پردہشت گردی کو بڑھاوا دینے کا الزام لگاتے ہوئے کہا کہ اس نےاس نے سابق سویت یونین کے خلاف جنگ کرنے کے لیئے ہزاروں مجاہدین کا استعمال کیا اور اب ایک دہائی کے بعد پاکستان کو اس کا سامنا ہے۔

انہوں نے کہا کہ پاکستان انتہا پسندوں کےساتھ نرم روی رکھنے والا ملک نہیں ہے جیسا کہ اکثر مغربی ممالک الزام لگاتے ہیں۔ انہوں نے کہا کہ پاکستان انتہا پسندی کے خلاف ہے۔ انہوں نے کہا کہ دہشت گردی کی جو شکل آج ہمارے اردگرد ہے وہ گزشتہ 26 برسوں سےاس خطے میں جاری انتہا پسندی کا نتیجہ ہے۔

مشرف نے کہا کہ’ سن 1979 میں پاکستان اور امریکہ نے افغانستان میں سویت یونین کے قبضے کے خلاف جنگ شروع کی۔امریکہ اور پاکستان سمیت مغربی ممالک نے دنیا بھر کے مجاہدین کو اکٹھا کر جہاد کی شروعات کی۔ ہم لوگوں نے ہی طالبان کو ہتھیار دیا اور انہیں وہاں بھیجا۔اس کام میں امریکہ اور پاکستان سمیت مغربی ممالک شامل تھے۔‘

انہوں نے کہا کہ سبھی نے 1989 میں تیس ہزار مجاہدین کو یہاں چھوڑ دیا۔ مشف نے مزید کہا کہ پاکستان کو اس کی بہت بڑی قیمت ادا کرنی پڑی۔ انہوں نے کہا کہ’ پاکستان دہشت گردی کے خلاف مغرب کے ساتھ کھڑا ہے۔

مشرف نے کہا کہ طالبان کوافغانستان کے عوام میں کافی حمایت حاصل ہے جس کی قیادت ملا عمر کے ہاتھ میں ہے۔انہوں نے کہا کہ ملا عمر نے کبھی پاکستان کا دورہ نہیں کیا۔ مشرف نے زور دے کر کہا کہ طالبان کو ختم کرنے کا واحد راستہ طاقت کا استعمال ہی ہے۔

مشرف کا یہ یورپی یونین کے صدر دفتر کایہ پہلا دورہ تھا ۔ مشرف نےاس موقع پر کشمیر تنازع کے پر امن حل کی امید بھی ظاہر کی۔