عزیزاللہ خان بی بی سی اردو ڈاٹ کام کوئٹہ

	بلوچ قوم پرست رہنما اکبر بگٹی کی ہلاکت کے بعد بلوچستان میں امن و عامہ کی صورتحال خراب ہوئی ہے۔

اطلاعات کے مطابق سوموار کی صبح کوئٹہ سے کوئی تین سو کلومیٹر دور خاران میں خفیہ ایجنسی کےدفتر کے قریب دھماکہ ہوا ہے جس سے عمارت کو نقصا ن پہنچا ہے لیکن کسی جانی نقصان کی اطلاع نہیں ہے۔

اس کے علاوہ کل رات مچھ اور کوئٹہ کے درمیان نا معلوم افراد نے بجلی کے چار کھمبوں کو دھماکوں سے اڑا دیا جس سے کوئٹہ اور دیگر علاقوں کو بجلی کی ترسیل معطل ہو گئی تھی۔ کوئٹہ میں بجلی کے محکمے کے ترجمان نے بتایا ہے کہ کوئٹہ کو متبادل ذرائع سے بجلی کی ترسیل شروع کر دی گئی ہے لیکن مستونگ وڈھ نال نوشکی خاران وغیرہ جیسے علاقے اس سے متاثر ہوں گے۔ ایک سو بتیس کے وی اور دو سو بیس کے وی کے ان چار کھمبوں کی مرمت کا کام سیکیورٹی کی اجازت کے بعد شروع کیا جائے گا اور اس پر ایک ہفتے سے دو ہفتے لگ سکتے ہیں۔

بلوچستان میں پہلے بھی بجلی کے کھمبوں پر حملے ہو رہے تھے لیکن اپنے آپ کا کالعدم تنظیم بلوچ لبریشن آرمی کا ترجمان ظاہر کرنے والے آزاد بلوچ نامی شخص نے کوئی دو ماہ پہلے کہا تھا کہ انہوں نے بجلی کے کھمبوں پر حملے کرنا بند کر دیئے ہیں اب دوبارہ بجلی کے کھمبوں پر حملے کون کر رہا ہے اس کے بارے میں کچھ معلوم نہیں ہے۔ اور تاحال کسی نے ان دھماکوں کی ذمہ داری قبول نہیں کی ہے۔