ریاض سہیل بی بی سی اردو ڈاٹ کام، کراچی

	اس سال پنجاب میں بھی شدید بارشیں ہوئی ہیں

ریلوے ٹریک زیر آب آنے کے بعد کراچی حیدرآباد ریلوے سروس بھی معطل ہے۔
حیدرآباد میں بارش کا سلسلہ جمعرات کی شام سے شروع ہوا جو چوبیس گھنٹوں سے جاری ہے، مسلسل بارش کی وجہ سے نشیبی علاقے زیر آب آگئے ہیں جبکہ کچھ مقامات پر مکانات منہدم ہونے کی بھی اطلاعات ہیں جس میں دس سے زائد افراد زخمی ہوگئے ہیں۔

شہر کا لطیف آباد کا علاقے سب سے زیادہ متاثر ہوا ہے، جہاں بارش کا پانی گھروں میں داخل ہوگیا ہے۔

حیدرآباد ضلعی حکومت نے شہر میں ہنگامی حالات نافذ کرتے ہوئے مدد کے لیئے فوج کو طلب کرلیا ہے، لوگوں کو زیر آب علاقوں سے نکالنے کے لیئے کشتیاں بھی منگوائی گئی ہیں جبکہ ریلیف کیمپ قائم کیے جارہے ہیں۔

ٹھٹہ میں شدید بارش کی وجہ سے جہمپیر اور بولہاڑی کے درمیان ریلوے ٹریک زیر آب آگیا ہے، جس وجہ سے ریل ٹریفک معطل کردی گئی ہے۔

کراچی ریلوے کے سپرنٹینڈنٹ نے بی بی سی کو بتایا ہے کہ گزشتہ چار گھنٹوں سے ریلوے سروس معطل ہے اور امکان ہے کہ کچھ گھنٹوں میں بحال ہوجائے گی۔

صحرائی علاقے تھر میں شدید بارش کے باعث کئی کچے مکانات منہدم ہوگئے ہیں، جبکہ میرپورخاص میں بارش کی وجہ سے سیم نالوں میں شگاف پڑ گئے ہیں جو پانی شہر کی طرف بڑھ رہا ہے، محکمہ آب پاشی کے حکام شگاف بند کرنے کی کوشش کر رہے ہیں۔

میرپورخاص میں کرنٹ لگنے سے ایک خاتون ہلاک ہوگئی ہیں جبکہ دو خواتین زخمی ہوئی ہیں۔

بدین، عمرکوٹ، ٹھٹہ، ٹنڈو جام، تھانہ بولا خان اور کوٹڑی میں بھی بارش جاری ہے۔ محکمہ موسمیات کے مطابق گزشتہ چوبیس گھنٹوں میں حیدرآباد میں ایک سو ستر ملی میٹر، مٹھی میں ایک سو چوہتر، بدین میں ساٹھ ملی میٹر بارش رکاردڈ کی گئی ہے۔

محکمہ موسمیات کا یہ بھی کہنا ہے کہ مون سون کی بارش کا سلسلہ سنیچر کے روز تک جاری رہے گا۔