رفعت اللہ اورکزئی بی بی سی اردو ڈاٹ کام، پشاور

	صوبہ سرحد میں حالیہ بارشوں میں دو سو سے زائد افراد ہلاک ہو چکے ہیں۔

تھانہ بٹیرا کےاے ایس آئی عبد القیوم نےمنگل کے روز بی بی سی کو بتایا کہ یہ واقعہ ضلع کوہستان کےگاؤں کوٹ مداخیل میں پیر اورمنگل کی درمیانی شب اس وقت پیش آیا جب بارش سے قریبی برساتی نالے میں پانی کی سطح بلند ہوگئی۔

ان کا کہنا تھا کہ اب تک چار افراد کی لاشیں سیلابی پانی سے نکالی جا چکی ہیں جبکہ دیگر افراد کی تلاش کا کام تیزی سے جاری ہے۔ہلاک ہونے والوں میں خواتین اور بچے بھی شامل ہیں۔

گاؤں کوٹ مداخیل ضلع کوہستان کے ہیڈکوارٹرز داسو سے اسی کلومیٹر کے فاصلے پر پہاڑوں میں واقع ہے۔

گزشتہ چند ہفتوں میں مون سون کی بارشوں اور سیلاب کی وجہ سے صوبہ سرحد کے چودہ اضلاع متاثر ہوئے ہیں جن میں سرکاری اعداد وشمار کےمطابق اب تک دو سو سے زائد افراد ہلاک اور سینکڑوں زخمی ہوئے ہیں جبکہ گھروں، دوکانوں، شاہراہوں ، کھڑی فصلوں کو پہنچنے والے نقصانات کا تخمینہ دو ارب روپے سے زائد لگایا گیا ہے۔

مانسہرہ اور کوہستان کے اضلاع میں بھی بڑے پیمانے پر تباہی ہوئی ہے اور اطلاعات کے مطابق پچاس سے زائد افراد ہلاک اور درجنوں زخمی ہوئے ہیں۔