اعجاز مہر بی بی سی اردو ڈاٹ کام، اسلام آباد

	سیکورٹی فورسز کے اہلکاروں کی ہلاکت کے متعلق متضاد دعوے سامنے آئے ہیں

فوجی ترجمان، وزیر مملکت برائے اطلاعات اور اخبارات میں سیکورٹی فورسز کے اہلکاروں کی ہلاکت کے متعلق متضاد دعوے سامنے آئے۔

گزشتہ رات گئے وزیر مملکت طارق عظیم نے بی بی سی بات کرتے ہوئے کہا تھا کہ چودہ سکیورٹی فورسز کے اہلکار مارے گئے ہیں جن میں کچھ افسر بھی شامل ہیں۔

رات گئے فوجی ترجمان نے ایک بیان میں بتایا کہ چوبیس سے چھبیس اگست تک سات اہلکار ہلاک اور تین زخمی ہیں۔ ہلاک ہونے والوں میں چار فوجی افسر بھی شامل ہیں لیکن ان کے عہدے ترجمان نے نہیں بتائے۔

فوجی ترجمان کا کہنا ہے کہ چوبیس اور پچیس اگست کو ایک مسلح جھڑپ میں سیکورٹی فورسز کے دو اہلکار ہلاک اور تین زخمی ہوگئے تھے۔ جبکہ ان کے مطابق چھبیس اگست کو چار افسر ہلاک اور ایک سپاہی زخمی ہوا ہے۔

انگریزی روزنامہ ڈان نے سرکاری ذرائع کے حوالے سے بتایا ہے کہ چھ افسران سمیت سکیورٹی فورسز کے اکیس اہلکار مارے گئے ہیں۔ اس اخبار نے نواب بگٹی اور ان کے مارے جانے والے ساتھیوں کی تعداد سینتیس بتائی ہے۔

اردو روزنامہ نوائے وقت نے دعویٰ کیا ہے کہ ہلاک ہونے والے چار افسران میں سپیشل سروسز، یعنی کمانڈوز کے ایک کرنل، دو میجر اور ایک کیپٹن شامل ہیں۔

اس بارے میں حقائق جاننے کے لیئے جب فوجی ترجمان، وزیر داخلہ، وزیر اطلاعات اور دیگر حکام سے علحیدہ علحیدہ رابطہ کیا گیا تو وہ دستیاب نہیں ہوسکے۔

فوجی اور سول حکام اس معاملے پر فی الوقت بات کرنے سے گریزاں معلوم ہوتے ہیں۔