ریاض سہیل بی بی سی اردو ڈاٹ کام، کراچی

	پہلا کروز تین نومبر کو کراچی سے دبئی روانہ ہوگا

پہلا کروز تین نومبر کو ایک ہزار سے زائد لوگوں کو لے کر کراچی سے بذریعہ بحریہ عرب دبئی روانہ ہوگا۔ یونان اور امریکی پاکستانیوں پر مشتمل ڈریم گلف کمپنی کو اس کروز سروس کا لائسنس جاری کیا گیا ہے۔

پاکستان نے وزیر جہاز رانی بابر غوری نے بی بی سی کو بتایا کہ پہلے مرحلے میں یہ کروز سروس کراچی سے دبئی کے درمیان شروع کی جاری ہے جس کے بعد اس کو کراچی،گوادر اور دبئی روٹ پرشروع کیا جائے گا۔

انہوں نے بتایا کہ یہ چار روز کا سفر ہوگا، کروز میں ساڑھے پانچ سو کمرے ہیں جبکہ بارہ سو مسافروں کی گنجائش ہے۔ اس کے علاوہ سوئمنگ پولز سمیت وہ تمام سہولیات ہیں جو ایک اچھے کروز میں ہونی چاہئیں۔

کراچی ممبئی فیری سروس کے بارے میں سوال کے جواب میں انہوں نے بتایا کہ ابھی تک شپنگ پروٹوکول پر دستخط نہیں ہوئے ہیں، پاکستانی حکومت نے منظوری دے دی اور بھارتی حکومت کی جانب سے مئی میں منظوری متوقع تھی لیکن بھارتی کابینہ نے منظوری نہیں دی ہے، تاہم بھارت کی جانب سے
ہمیں مثبت اشارے مل رہے ہیں۔ امکان ہے کہ ستمبر یا اکتوبر میں وہاں سے منظوری مل جائے گی۔

انہوں نے بتایا کہ حکومت اب تک چار لائسنس جاری کرچکی ہے۔ جس میں میں کراچی ممبئی، دبئی اور کراچی ممبئی، گوادر اور مسقط شامل ہیں جبکہ اور لوگ بھی دلچسپی کا اظہار کر رہے ہیں۔

کراچی اور گوادر کے درمیان فیری سروس کے بارے میں ان کا کہنا تھا کہ وہاں ہوٹل موجود نہیں ہیں، ایک کمپنی نے وہاں ہوٹل بنایا ہے جو تین چار ماہ میں مکمل ہوجائے گا۔ جس کے بعد جو سروس کراچی اور دبئی چل رہی ہے۔ یہ کراچی گوادر اور دبئی شروع ہوجائے گی۔