رفعت اللہ اورکزئی بی بی سی اردو ڈاٹ کام، پشاور

	سوات میں حالیہ بارشوں اور سیلاب کی وجہ سے شاہراہوں کو وسیع پہنچانے پر نقصان پہنچا ہے

پولیس کے مطابق یہ واقعہ پیر اور منگل کی درمیانی رات اس وقت پیش آیا جب شانگلہ سے مینگورہ آنے والی ایک ڈاٹسن پک آپ چمتلی خوازہ خیلہ کے مقام پر ایک برساتی نالے میں جا گری۔ واقعے میں گاڑی میں سوار تمام مسافر ہلاک ہوگئے جن میں دو خواتین اور ایک بچہ بھی شامل ہیں۔ جان بحق ہونے والوں میں چھ افراد کی شناخت ہوگئی ہے جبکہ دیگر سات افراد کی لاشیں خوازہ خیلہ ہسپتال میں شناخت کے لئے رکھی گئی ہیں۔

پولیس کا کہنا ہے کہ واقعہ خوازخیلہ کے مقام پر سڑک سیلابی پانی میں بہہ جانے کی وجہ سے پیش آیا۔

حکام کے مطابق ضلع سوات میں حالیہ بارشوں اور سیلاب کی وجہ سے شاہراہوں کو وسیع پہنچانے پر نقصان پہنچا ہے جس کی وجہ سے آئے روز ٹریفک واقعات رونما ہورہے ہیں۔

ادھر مون سون کی حالیہ اور مسلسل بارشوں سے خوازہ خیلہ پل منہدم ہوگیا ہے جسکی وجہ سے کالام اور خوازہ خیلہ کے مابین اہم شاہراہ بند ہوگئی ہے اور لوگوں کو مشکلات کا سامنا ہے۔

واضع رہے کہ صوبہ سرحدکے بیشتر اضلاع میں شدید بارشوں اور سیلابی ریلوں کے باعث تین سو سے زائد افراد ہلاک ہوچکے ہیں اور وسیع پیمانے پر مکانات، کھڑی فصلوں اورمال مویشیوں کو نقصان پہنچا ہے جبکہ سینکڑوں دیہات صفہ ہستی سے مٹ گئے ہیں۔

حکومت متاثرہ افراد کو بروقت امداد فراہم کرنے میں ناکام دکھائی دیتی ہے جس کی وجہ سے اکثر علاقوں سے حکومت کے خلاف احتجاج کی اطلاعات بھی موصول ہو رہی ہے۔