ذوالفقار علی بی بی سی اردو ڈاٹ کام، مظفرآباد

	متاثرہ علاقوں میں سڑکوں کی حالت بہتر کرنے میں سالوں لگ سکتے ہیں

زخمیوں کو مظفرآباد کے ایک ہسپتال میں داخل کردیا گیا ہے جہاں ان کی حالت خطرے سے باہر بتائی جاتی ہے۔

مظفرآباد میں پولیس کا کہنا ہے کہ یہ مسافر جیپ نڑان نامی گاؤں جارہی تھی کہ راستے میں چنار بنگ کے مقام پر گہری کھائی میں گر گئی۔

پولیس کے مطابق پانچ لوگ موقع پر ہی ہلاک ہوگئے تھے جبکہ زخمی ہونے والے سات افراد کو مظفرآباد کے ایک ہسپتال میں منتقل کردیا گیا تھا جہاں ایک بچہ زخموں کی تاب نہ لاتے ہوئےچل بسا۔

ڈاکٹروں کا کہنا ہے کہ دیگر چھ زخمیوں میں میں سے ایک کی حالت تشویشناک ہے۔ پولیس کا کہنا ہے کہ ابھی حادثے کی وجہ معلوم نہیں ہوسکی ہے جبکہ تحقیقات جاری ہیں۔

ایک عینی شاہد کا کہنا ہے کہ جس مقام پر یہ گاڑی لڑھک کر کھائی میں گری ہے وہاں مٹی کا تودہ گرنے کی وجہ سے سڑک کی حالت اتنی خراب ہے کہ بمشکل وہاں سے چھوٹی گاڑی گزر سکتی ہے۔

پاکستان کے زیرِ انتظام کشمیر کے چار متاثرہ اضلاع میں آٹھ اکتوبر کے زلزے کے باعث سڑکیں تباہ ہوگئی تھی۔ ان میں کچھ سڑکوں کی حالت قدرے بہتر کی گئی ہے لیکن اب بھی بہت سی سڑکیں یا تو تباہ ہیں یا ان کی حالت بہت ہی خراب ہے۔ ان سڑکوں کی یا تو مرمت نہیں ہوئی ہے اور اگر ہوئی بھی تو بارشوں اور آفٹر شاکس کی وجہ سے یہ پھر خراب ہوجاتی ہیں۔ اس وجہ سے لوگوں کو آمد و رفت میں خاصی مشکلات پیش آرہی ہیں۔

حکام کا کہنا ہے کہ آٹھ اکتوبر کے زلزے کے بعد اب تک کشمیر کے اس علاقے کے متاثرہ علاقوں میں ایک درجن سے زائد ٹریفک کے حادثات ہوئے ہیں جن میں درجنوں افراد ہلاک ہوگئے ہیں۔ حکام کا کہنا ہے کہ متاثرہ علاقوں میں سڑکوں کی حالت بہتر کرنے میں سالوں لگ سکتے ہیں۔