فراز ہاشمی بی بی سی اردو ڈاٹ کام، اسلام آباد

	وفاقی سیکریٹری داخلہ کمال شاہ گزشتہ ہفتے ایران کا تین روزہ دورہ کر کے واپس لوٹے ہیں

پاکستان کے سیکریٹری داخلہ کمال شاہ نے منگل کو ایک پریس کانفرنس میں بتایا کہ ایرانی حکام کی طرف سے یہ یقین دہانی ان کے وزیرِ داخلہ اور قائم مقام وزیر خارجہ کی طرف سے کرائی گئی۔

حکومتِ پاکستان نے بلوچستان میں مبینہ طور پر تخریبی سرگرمیوں میں ملوث بلوچستان لبریشن آرمی نامی تنظیم کو دہشت گرد قرار دے کر اس پر پابندی عائد کر دی تھی۔

کمال شاہ گزشتہ ہفتے ایران کا تین روزہ دورہ کر کے واپس لوٹے ہیں۔ انہوں نے کہا کہ ایرانی حکام سے مذاکرات میں انہوں نے ایرانی حکام کو یہ بڑے واضح الفاظ میں باور کرایا کہ پاکستانی بلوچستان میں عدم استحکام کے اثرات ایرانی بلوچستان پر مرتب ہوں گے۔

انہوں نے کہا کہ ایران کے تیس میں سے نو صوبوں میں بلوچ آباد ہیں اور سب سے زیادہ بلوچ آبادی سیستان کے صوبے میں ہے جس کی سرحد پاکستان سے ملتی ہے۔

انہوں نے کہا کہ ایران اور پاکستان کے درمیان ایک دوسرے کے قیدیوں کو رہا کرنے پر بھی مفاہمت ہوگئی ہے اور اس معاملے کے قانونی پہلوؤں کا جائزہ لینے کے لیے دونوں ملکوں کے وزارتِ خارجہ کے اہلکاروں کا اجلاس اگست میں متوقع ہے۔

انہوں نے کہا کہ ایران کی مختلف جیلوں میں چورانے پاکستانی قید ہیں۔

کمال شاہ نے کہا کہ ایک سال سے زیادہ عرصے سے قید ان پاکستانیوں کو ابھی تک ایران میں پاکستانی سفارت خانے کے اہلکاروں کو بھی ملنے کی اجازت نہیں دی گئی۔

انہوں نے کہا کہ پاکستان میں بھی دس کے قریب ایرانی قید ہیں جن کی نشاندہی ہو چکی ہے تاہم تمام صوبوں کو کہا گیا ہے کہ اگر صوبائی جیلوں میں کوئی ایرانی قید ہیں تو اس کے بارے میں وفاقی وزارتِ داخلہ کو مطلع کریں۔

انہوں نے کہا کہ ایرانی حکام نے وعدہ کیا ہے کہ تمام پاکستانیوں کو سفارت خانے کے حکام سے ملنے کی جلد اجازت دی جائے گی۔

کمال شاہ نے کہا کہ اس طرح پاکستانی جیلوں میں قید ایرانیوں کو بھی ان کے سفارت خانے کے حکام سے ملنے کی اجازت دے دی جائے گی۔

ایک سوال کا جواب دیتے ہوئے انہوں نے کہا کہ اس بارے میں ابھی حکومت پاکستان کے پاس کوئی تفصیل موجود نہیں کہ جو پاکستانی ایرانی جیلوں میں بند ہیں ان کے خلاف کیا الزامات عائد کیئے گئے ہیں۔

کمال شاہ نے انسانوں کی اسمگلنگ کے حوالے سے کہا کہ اس مسئلہ پر بھی ایرانی حکام سے بات ہوئی اور اس سلسلے میں مستقل رابطہ رکھنے کے لیئے دونوں ملک ایک ایک حکومتی اہلکار کی نشاندھی کریں گے جو ایک دوسرے سے باقاعدہ معلومات کا تبادلہ کریں گے۔

انہوں نے کہا کہ پاکستان نے ایرانی حکام پر زور دیا کہ ان ایجنٹوں کے خلاف کارروائی کی جائے جو ان لوگوں کی اسمگلنگ میں ملوث ہیں۔

کمال شاہ نے کہاکہ انہوں نے ایرانی حکومت کوان ایجنٹوں کی ایک فہرست مہیا کی ہے جو مبینہ طور پر انسانی اسمگلنگ میں ملوث ہیں۔

سیکریٹری داخلہ نے کہاکہ ایرانی حکام نے انہیں ایک فلم دکھائی جس میں ایران سے تعلق رکھنے والے کچھ جرائم پیشہ افراد نے ایران سے اغواء کرکے لائے جانے والےایک شخص کو پاکستان کے اندر لا کر ذبح کرتے ہوئے دکھایا گیا۔

انہوں نے کہا کہ ایرانی حکام کے مطابق تین ایسے ایرانی گروہ ہیں جو ایران میں جرائم کرکے پاکستان کی سرحدوں میں داخل ہو جاتے ہیں۔ ان میں سب سے خطرناک گروہ عبدالرحمان ریگی کاہے۔

کمال شاہ نے کہا کہ پاکستان نے بلوچستان میں پائی جانے والی صورت حال کے بارے میں بھی ایرانی حکام سے تبادلہ خیال کیا اور انہیں یہ باور کرایا کہ پاکستانی بلوچستان میں عدم استحکام کے اثرات ایرانی بلوچستان پر بھی ہو سکتے ہیں۔