عدنان عادل بی بی سی اردو ڈاٹ کام، لاہور

	نیب کے مطابق زاہد علی اکبر کے ستتر بینکوں کھاتوں میں سترہ کروڑ ساٹھ لاکھ روپے جمع ہیں

لاہور میں احتساب عدالت کے جج شفقات احمد ساجد کی عدالت میں قومی احتساب بیورو کی جانب سے سوموار کو ریٹائرڈ لیفٹینٹ جنرل اور سابق کور کمانڈر راولپنڈی زاہد علی اکبر کے خلاف بدعنوانی کا ایک مقدمہ دائر کیا گیا تھا۔

لاہور کے رہائشی لیفٹیننٹ جنرل زاہد علی اکبر اس وقت ملک سے باہر ہیں۔

اسلام آباد میں قومی احتساب بیورو کی طرف سے جاری ہونے والے ایک پریس ریلیز میں کہا گیا تھا کہ زاہد علی اکبر نے انیس سو ستاسی سے انیس سو بانوے تک جب وہ چیئرمین واپڈا اور چیئرمین پاکستان کرکٹ بورڈ تھے تو وہ کرپشن اور بدعنوانی میں ملوث رہے۔

احتساب بیورو کے پریس ریلیز کے مطابق ان کے خلاف جو شواہد اکھٹے کیئے گئے ہیں ان سے ظاہر ہوتا ہے کہ زاہد علی اکبر کے ستتر بینک کھاتوں میں سترہ کروڑ ساٹھ لاکھ روپے جمع ہیں۔

یہ بینک کھاتے یا تو زاہد علی اکبر کے اپنے نام، یا ان کے قریبی رشتہ داروں یا ان کی مختلف بزنس کمپنیوں کے نام ہیں۔

ان کے علاوہ زاہد علی اکبر نے انیس سو تراسی سے انیس سو اٹھانوے تک سات لاکھ چھ ہزار دو سو ڈالر جو چھالیس روپے فی ڈالر کی قیمت سے تین کروڑ چوبیس لاکھ روپے بنتے ہیں ملک سے باہر منتقل کیئے۔

احتساب بیورو کے مطابق یہ اثاثے ان کے ذرائع آمدن سے مطابقت نہیں رکھتے۔اس کے علاوہ احتساب بیورو نے اس ریفرنس میں یہ بھی تحریر کیا ہے کہ ’ملزم‘ کا رہن سہن بھی ان کے ذرائع آمدن سے مطابقت نہیں رکھتا۔