اعجاز مہر بی بی سی اردو ڈاٹ کام، اسلام آباد

چھتیس برسوں میں پاکستان میں فوکر طیاروں کے ان پانچوں حادثات میں تا حال ایک سو اڑسٹھ افراد ہلاک ہوچکے ہیں۔

پی آئی اے فوکر کو حادثہ، پنتالیس افراد ہلاک

پی آئی اے کے اسلام آباد میں ترجمان لطیف عباسی نے بتایا کہ ملتان کے ہوائی اڈے سے لاہور جانے والی پرواز پی کے 688 اڑان کے پانچ منٹ بعدگر کر تباہ ہوگئی۔ ان کے مطابق پی آئی اے کے پاس گزشتہ چالیس برس سے سات فوکر طیارے زیرِ استعمال ہیں۔ ان طیاروں کے بارے میں بعض ماہرین کا کہنا ہے کہ وہ خاصے پرانے ہوچکے ہیں اور ان کا استعمال خطرناک ہے۔

تاہم اس بارے میں پی آئی اے کے صدر دفتر کراچی کے ایک ترجمان کیپٹن حسن جعفری کا کہنا ہے کہ چالیس برس سے یہ طیارے زیر استعمال تو ہیں لیکن وہ ناکارہ نہیں ہیں۔

انہوں نے بتایا کہ انتظامیہ نے آئندہ برس کے وسط تک ساتوں فوکر طیارے تبدیل کرنے کا منصوبہ شروع کیا ہے اور فرانس سے ATR طیارے خریدے جارہے ہیں۔ ان کے مطابق ایک طیارہ آچکا ہے جبکہ باقی آنے والے ہیں۔

ترجمان نے بتایا کہ پاکستان میں پی آئی اے کے زیرِاستعمال فوکر طیارے کا پہلا حادثہ انیس سو ستر میں پیش آیا جس میں تیس مسافر ہلاک ہوگئے تھے۔دوسرا حادثہ انیس سو بہتر میں پیش آیا اور اس میں چھبیس افراد ہلاک ہوئے۔ یہ دونوں حادثے راولپنڈی / اسلام آباد میں پیش آئے۔

کیپٹن حسن جعفری نے بتایا کہ انیس سو چھیاسی میں پشاور میں ایک فوکر طیارہ گرا تھا جس میں تیرہ افراد ہلاک ہوئے تھے۔ ان کے مطابق انیس سو نواسی میں گلگت میں بھی ایک فوکر طیارہ چّون مسافروں سمیت لاپتہ ہوگیا تھا جس کا آج تک کوئی نام و نشان نہیں ملا۔

واضح رہے کہ فروری سن دو ہزار تین میں پاکستان ایئر فورس کے سربراہ مصحف علی میر بھی فوکر طیارے کے حادثے میں سترہ افسران سمیت ہلاک ہوگئے تھے۔

پی آئی اے اور ایئر فورس کے فوکر طیاروں کے حادثات کی تفصیلی تحقیقاتی رپورٹ تو حکومت نےکبھی منظر عام پر نہیں لائی لیکن اتنا بتایا جاتا ہے کہ حادثات فنی خرابی کی وجہ سے پیش آئے۔