ریاض سہیل بی بی سی اردو ڈاٹ کام کراچی

	’نجکاری انتہائی ضروری ہے تو پھر ملازمین اس کی نیلامی میں ضرور حصہ لیں گے‘

کراچی میں اتوار کے روز پاکستان سٹیل ایمپلائز ایکشن کمیٹی کے کنوینر شمشاد قریشی، محمد محسن اور دیگر ارکان نے ایک پریس کانفرنس میں بتایا کہ انہیں سپریم کورٹ کے تفصیلی فیصلے کا انتظار ہے جس سے تعین ہوگا کہ کون غیر قانونی اور غیر آئینی نجکاری میں ملوث رہا ہے اس کے بعد ان افرار کے خلاف ریفرنس دائر کیا جائے گا۔

انہوں نے کہا کہ سٹیل ملز کی نجکاری میں ’بدعنوانی اور نااہلی‘ ثابت ہونے پر سربراہ پاکستان سٹیل سمیت تمام ذمہ داران کو فوری طور پر نہ صرف برطرف کیا جائے بلکہ قومی وسائل کے بے دریغ استعمال اور غیر پیداواری اخراجات کی اعلیٰ سطح پر تحقیقات کی جائیں۔

انہوں نے تجویز دیتے ہوئے کہا کہ سپریم کورٹ کے جس بنچ نے سٹیل ملز کی نجکاری کو کالعدم قرار دیا ہے وہ ہی تحقیقاتی کمیٹی قائم کرے اور اس کا سربراہ اسی بنچ کے کسی معزز جج کو مقرر کیا جائے۔

سٹیل ملز کے مزدور رہنماؤں نے کراچی الیکٹرک سپلائی کارپوریشن اور پی ٹی سی ایل کے ملازمین کو مشورہ دیا ہے کہ وہ بھی سپریم کورٹ کے اس فیصلے کو بنیاد بنا کر عدالت سے رجوع کریں اور ان اداروں کی نجکاری کا ازسر نو جائزہ لینے کی استدعا کریں۔

ان کا کہنا تھا کہ سپریم کورٹ نے واضح کیا ہے کہ قومی ادارے کی نجکاری کے لیئے مشترکہ مفادات کی کونسل کی منظوری لازمی ہے جس کے بغیر نجکاری غیر آئینی ہے۔

ایمپلائز ایکشن کمیٹی کے رہنماؤں نے بتایا کہ سٹیل ملز کی نجکاری کی ہر سطح پر مخالفت کی جائےگی۔ انہوں نے کہا کہ اگر قومی مفادات کے تحت اس کی نجکاری انتہائی ضروری ہے تو پھر ملازمین اس کی نیلامی میں ضرور حصہ لیں گے۔ انہوں نے کہا کہ انتظامیہ اور نجکاری کمیشن نے ملی بھگت کرکے ان کو اس حق سے محروم رکھا تھا۔

انہوں نے مطالبہ کیا کہ نجکاری کے خلاف جدوجہد کے دوران ملازمین کے رہنماؤں پر درج مقدمات اور شوکاز نوٹس واپس لیئے جائیں۔