اعجاز مہر بی بی سی اردو ڈاٹ کام، اسلام آباد

	لاٹری کے نام پر لوٹنے والوں نے اب تیسری دنیا کے ممالک کا رخ کر لیا ہے۔

پیر کے روز دفتر خارجہ سے جاری ہونے والے ایک بیان میں بتایا گیا ہے کہ انہیں کئی شہریوں سے شکایات موصول ہوئی ہیں کہ ’لاٹری کمپنیاں، جوکہ یورپ اور ہرجگہ قائم ہیں وہ لوگوں کو مطلع کرتی ہیں کہ ان کا لاٹری میں ہزاروں ڈالر کا انعام نکلا ہے اور رقم لینے کے لیے پہلے چند ہزار ڈالر انشورنس چارجز ادا کریں۔

دفتر خارجہ کے بیان کے مطابق متعلقہ نوسرباز کمپنیاں جن شہریوں سے رقم وصول کرلیتی ہیں پھر انہیں نہ رقم ملتی ہے اور نہ ہی انہیں کوئی جواب ملتا ہے۔

حکومت نے اپنے شہریوں سے کہا ہے کہ وہ اس طرح کی کمپنیوں کے ڈاک کے ذریعے ملنے والے خط یا ای میل وغیرہ پر بھیجے گئے پیغامات اور اشتہارات سے خبردار رہیں۔

پاکستان حکومت نے یہ تو نہیں بتایا کہ تا حال کتنے پاکستانی جعلی لاٹری کا شکار ہوئے اور کتنی رقم ضائع کرچکے ہیں لیکن ان کے بیان سے اندازہ ہوتا ہے کہ یہ ایک سنگین مسئلہ بن چکا ہے۔

عام طور پر دفتر خارجہ ایسے معاملات سے دور رہتا ہے لیکن اس طرح کا بیان جاری کرکے اپنے شہریوں کو خبردار کرنے سے محسوس ہوتا ہے کہ جعلی لاٹری والوں کی لوٹ مار سے لُٹنے والوں کی تعداد بہت زیادہ ہے۔